އިންޑިއާގެ ކުންފުންޏަކާއެކު 61 ރަށެއްގައި ޕޮލިސް ސްޓޭޝަން އެޅުމުގެ މަޝްރޫޢު ހިންގުމުގައި ހިޔާނާތްތެރިވެފައިވާ ކަމުގެ ތުހުމަތު އަމާޒުވެފައިވާތީ، އެކަން ބަލައިދިނުމަށް އެދި ކުރީގެ އިކޮނޮމިކް މިނިސްޓަރ ފައްޔާޒް އިސްމާޢީލް އެންޓި-ކޮރަޕްޝަން ކޮމިޝަން (އޭސީސީ) އާއި ފުލުހުންނަށް މައްސަލަ ހުށަހަޅުއްވައިފިއެވެ.
އެމްޑީޕީ ސަރުކާރުން ކުރިއަށް ގެންދިޔަ މި މަޝްރޫޢުއާ ގުޅިގެން ހޯމް މިނިސްޓަރ ޢަލީ އިޙްސާން އެކި ޕްލެޓްފޯމްތަކުގައި ދޮގު މަޢުލޫމާތު ފަތުރަމުންދާކަމަށް ފާހަގަކުރައްވައި، މައްސަލަ ބަލަމުންދާނަމަ އެކަން އަންގައިދިނުމަށާއި، ތަޙްޤީޤަށް ފުރިހަމަ އެއްބާރުލުން ދެއްވާނެކަމަށް ވިދާޅުވެފައިވެއެވެ. އަދި މިއީ އޭސީސީ އާއި ފުލުހުން ބަލަމުންނުދާ މައްސަލައެއްނަމަ، ތަޙްޤީޤުކޮށް ޙަޤީޤަތް ހާމަކޮށްދިނުމަށްވެސް އެދިވަޑައިގެންފައިވެއެވެ.
ރައްޔިތުންގެ މަޖިލީހުގެ ހޯމަ ދުވަހުގެ ޖަލްސާގައި ވާހަކަފުޅު ދައްކަވަމުން އިޙްސާން ވިދާޅުވެފައިވަނީ 3.6 މިލިއަން ޑޮލަރަށް އިންޑިއާ ކުންފުންޏަކާ މަސައްކަތް ޙަވާލުކުރި ނަމަވެސް، މަޝްރޫޢުގެ ދަށުން އެއްވެސް މަސައްކަތެއް ކުރިއަށް ގެންގޮސްފައިނުވާ ކަމަށެވެ. އަދި މި މަސައްކަތް އޭރުގެ އިކޮނޮމިކް މިނިސްޓްރީގައި ދެ އަހަރު ވަންދެން އޮތުމަށްފަހު، 2021 ވަނަ އަހަރު ފުލުހުންނާ ހަމައަށް ގެންދެވުނު ކަމަށްވެސް ފާހަގަކުރެއްވިއެވެ.
އިޙްސާން އިތުރަށް ވިދާޅުވެފައިވަނީ މި މަޝްރޫޢު ޙަވާލުކުރެވުނު އިންދިރާ ކުންފުނިން ރާއްޖޭގައި ކުރަނީ ހަމައެކަނި އެންމެ މަސައްކަތެއް ކަމަށާއި، އެއީ ފައްޔާޒްގެ ބޭބޭފުޅުންކަމަށްވާ ހ. ބޯގަންވިލާ ހަސަން އިސްމާޢީލާއި މއ. ފަށުވި، މުޙައްމަދު މުންޝިދުގެ ބިގް ކުންފުނީގެ ހިއްސާ ގަނެގެން މޫނިމާގެ ކިޔާ ގެއެއް އިމާރާތްކުރުމުގެ މަސައްކަތް ކަމަށެވެ.
މި މަޝްރޫޢުއާ ގުޅޭ މަޢުލޫމާތު ކުރިން އެކި ޕްލެޓްފޯމްތަކުގައި ހާމަކޮށްފައިވާ ކަމަށް ފައްޔާޒް ވިދާޅުވެފައިވެއެވެ. އަދި ތަޙްޤީޤީ އިދާރާތަކުގެ ބެލެނިވެރި ވަޒީރެއްގެ ގޮތުގައި އިޙްސާން ހުންނަވާތާ އަހަރެއް ވާން ކައިރިވެފައިވާއިރު، އެއްވެސް ތަޙްޤީޤެއް ނުކުރައްވައި، ދަޢުވާއެއް ނުއުފުއްލަވައި މިފަދަ ތުހުމަތުތަކެއް ކުރެއްވުމަކީ ޒިންމާދާރުކަން ކުޑަ ޢަމަލެއްކަމަށް ފާހަގަކުރައްވައި، މި ހިޔާނާތުގެ ވާހަކަ މިނިސްޓަރު އިޙްސާން ދެން ދައްކަވަންވާނީ ރައްޔިތުންގެ ފަރާތުން ޙަވާލުކޮށްފައިވާ ޒިންމާ އަދާކުރެއްވުމަށްފަހުގައި ކަމަށް ފާހަގަކުރެއްވިއެވެ.
