އެކްސްޕެޓް ސިސްޓަމް ހެދި މޭލޭޝިއާގެ ބެސްޓިނެޓް ކުންފުންޏަށް ބަދަލު ދިނުމަށް ލަފާދީފައިވަނީ ކުރީ ސަރުކާރުގެ ބަންޑާރަ ނައިބު ކަމަށް ހޯމްލޭންޑް ސެކިއުރިޓީ މިނިސްޓަރު އަލީ އިހްސާން ވިދާޅުވެއްޖެއެވެ.
މިއަދު ރައްޔިތުންގެ މަޖިލީހުގައި ވަޒީރުންނާ ސުވާލުކުރުމުގެ ވަގުތުގައި، ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލް ކުރެއްވި ސުވާލަށް ޖަވާބު ދެއްވަމުން، މިނިސްޓަރު އިހްސާން ވިދާޅުވީ މި ސަރުކާރު ވެރިކަމާ ހަވާލުވިއިރު ބެސްޓިނެޓް ކުންފުނިން ކުރީގެ ސަރުކާރުތަކާއެކު އަށް ސިޓީ ބަދަލުކޮށްފައިވާ ކަމަށެވެ. އަދި އެ ކުންފުނީގެ ލޯ ފާމްތަކުން ހަތަރު ފަހަރެއްގެ މަތިން ދިވެހި ދައުލަތުގެ މައްޗަށް ކްލެއިމް ކޮށްފައިވާކަން ފާހަގަކުރެއްވިއެވެ.
އިހްސާން އިތުރަށް ވިދާޅުވީ، އޭރުގެ ރައީސުލްޖުމްހޫރިއްޔާގެ އޮފީހުން ބަދަލު ދިނުމުގެ މަރުހަލާއަށް ދާންޖެހިދާނެ ކަމަށް މޯލްޑިވްސް އިމިގްރޭޝަން އާއި އިކޮނޮމިކް މިނިސްޓްރީއަށް ސިޓީ ފޮނުވާފައިވާ ކަމަށެވެ. މި މައްސަލައިގައި ބެސްޓިނެޓުން ވަނީ ވަގުތުން 15 މިލިއަން ޑޮލަރަށް ކްލެއިމްކޮށްފައެވެ. އަދި އެއަށްފަހު އެއްބަސްވުމުގެ ބާކީ މުއްދަތަށް ގެއްލުންވާ އަދަދަށް ކްލެއިމްކުރާނެ ކަމަށް އެ ކުންފުނިން ބުނެފައިވެއެވެ.
މިނިސްޓަރު އިހްސާން އިތުރަށް ވިދާޅުވީ، މީގެ ކުރިން އެކްސްޕެޓް ސިސްޓަމުން ދައުލަތަށް ވަންނަމުން އައީ 600 މިލިއަން ރުފިޔާ ނަމަވެސް، މި ސަރުކާރުން ހެދި އެއްބަސްވުމާއެކު 900 މިލިއަން ރުފިޔާ ވަންނާނެ ކަމަށެވެ.
