ހައުސިންގ ޑިވެލޮޕްމަންޓް ފައިނޭންސް ކޯޕަރޭޝަން (އެޗްޑީއެފްސީ) އިން މިއަދު ހުޅުމާލޭގެ ގޯއްޗެއް ނީލަމުގައި ވިއްކާލުމަށް އިއުލާންކޮށްފިއެވެ.
"ހުޅުމާލެ ގޯތި ނަންބަރު 10718 (އޯކިޑް ހިޔާ)" މި ނަމުގައި އެނގޭ މި ގޯއްޗަކީ ހަދީޖާ އަބްދުއްސައްތާރު، މއ. ޗަންޕާމާގެ، މާލެ އަދި ޖަމީލު އުސްމާން، ދަފްތަރު.ނަންބަރު 3290، މާލެ އަށް ދޫކޮށްފައިވާ ލޯނަށް ރަހުނުކޮށްފައިވާ ތަނެކެވެ. 10718 އަކަފޫޓުގެ މި ގޯތި ވިއްކާލުމުގެ ހުއްދަ ސިވިލް ކޯޓުން ދީފައިވަނީ މިދިޔަ މަހުގެ 30 ވަނަ ދުވަހުއެވެ.
އަންނަ މަހުގެ 14 ވަނަ ދުވަހާ ހަމައަށް މި ނީލަމުގައި ބައިވެރިވުމުގެ ފުރުސަތު ހުޅުވާލާފައިވާއިރު، ގޯތި ގަތުމަށް ހުށަހެޅޭނެ އެންމެ ދަށް އަގަކީ 25.7 މިލިޔަން ރުފިޔާކަމަށް އެޗްޑީއެފްސީން ބުނެފައިވެއެވެ.
އެޗްޑީއެފްސީގެ މުވައްޒަފުންނާއި، ބޯޑް ޑައިރެކްޓަރުންނާއި އަދި އެފަރާތްތަކުގެ އާއިލާގެ އެއްވެސް މެންބަރަކަށް މި ނީލަމުގައި ބައިވެރިއެއް ނުވެވޭނެއެވެ.
މީގެ އިތުރުން، ލޯނު ނުދެއްކިގެން ރަހުނުކޮށްފައިވާ މާލޭގެ ދެ ގެއެއް ވިއްކާލުމަށް ބޭންކް އޮފް މޯލްޑިވްސްއިން ވެސް މިދާދި ފަހުން ވަނީ އިއުލާންކޮށްފައެވެ.
