ހުޅުމާލެ ސެންޓްރަލް ޕާކު ސަރަހައްދުގައި މި އަހަރުގެ ސެޕްޓެމްބަރު 6 ވަނަ ދުވަހުގެ ރޭ ދަންވަރު ހިނގި ނުރައްކާތެރި އެކްސިޑެންޓާ ގުޅިގެން އެ ހާދިސާގައި ކާރު ދުއްވި ސ. ހިތަދޫ، ވިސާމް ސިދުގީ (26އ) ގެ މައްޗަށް ދަޢުވާ އުފުލުމަށް މިދިޔަ ހޮނިހިރު ދުވަހު ވަނީ ޕްރޮސެކިއުޓަރ ޖެނެރަލްގެ އޮފީހަށް ފޮނުވާފައެވެ.
މި ހާދިސާގައި ވިސާމް ދުއްވި ކާރު ޖެހުމުން މޯލްޑިވްސް ޕްރިޒަންސްގެ ކޯޕްރަލް ހަސަން ސަމާހަށް ވަނީ ނުރައްކާތެރި އަނިޔާތަކެއް ލިބިފައެވެ. އެ އަނިޔާތަކަށް ހުޅުމާލެ ހޮސްޕިޓަލުގައި ފަރުވާދެމުން ދަނިކޮށް ސަމާހު ވަނީ އިންތިގާލުވެފައެވެ. ފުލުހުން ބުނާ ގޮތުގައި ވިސާމަކީ އެއްގަމު އުޅަނދު ދުއްވުމުގެ ލައިސަންސް އޮތް މީހެއް ނޫނެވެ.
މި ހިތާމަވެރި ހާދިސާއާ ގުޅިގެން ރައީސް ޑރ. މުޙައްމަދު މުޢިއްޒު ވަނީ ބާރު ސްޕީޑުގައި ނުރައްކާތެރިކޮށް ވެހިކަލް ދުއްވާ ފަރާތްތަކާމެދު ހަރުކަށި ފިޔަވަޅު އެޅުމަށް ޤާނޫނަށް ގެންނަންޖެހޭ ބަދަލުތައް ގެނައުމަށް ކަމާބެހޭ އިދާރާތަކަށް އަންގަވާފައެވެ. އެހެންނަމަވެސް މިއަދާ ހަމައަށްވެސް އެފަދަ ބަދަލެއް ގެނައުމަށް ރައްޔިތުންގެ މަޖިލީހަށް އެއްވެސް ބިލެއް ހުށަހަޅާފައެއް ނުވެއެވެ.
ކޮމެންޓު ފޮނުވާ