ޢާއްމު ގޮތެއްގައި މޫސުން ރަނގަޅު ކަމަށް ފެނުނު ނަމަވެސް، ދިޔަވަރު ބޮޑުވާ ވަގުތުތަކުގައި ބައެއް ރަށްތަކަށް އުދައިގެ އަސަރު ކުރުމުގެ ފުރުޞަތު އޮތް ކަމަށް ރާއްޖޭގެ މޫސުމާބެހޭ ޤައުމީ އިދާރާ (މެޓް) އިން ލަފާކޮށް. ހުދު ސަމާލުގެ އިންޒާރު ނެރެފިއެވެ.
ވިއްސާރަ މޫސުމަކަށްފަހު މޫސުން ރަނގަޅުވާން ފެށުމާއެކު، މެޓް އިން ވަނީ އުދަ އެރުމުގެ ނުރައްކާ އޮތް ކަމަށް ބުނެ ރައްޔިތުންނަށް ސަމާލުގެ ނޯޓިސް ނެރެމުން ގޮސްފައެވެ.
މި މަހުގެ 16 ވަނަ ދުވަހުން ފެށިގެން ހުދު ސަމާލުކަން ނެރެފައިވީ ނަމަވެސް، މިރޭގެ މޫސުމާ ގުޅޭ ގޮތުން މެޓް އޮފީހުން މަޢުލޫމާތު ދެއްވާފައިވަނީ، ޢާއްމު ގޮތެއްގައި ރާއްޖޭގެ މޫސުން ރަނގަޅުވާނެ ކަމަށެވެ. އިތުރު ތަފްޞީލުތަކުގެ ތެރޭގައި، ހުޅަނގުދެކުނާއި ހުޅަނގުން ދެކުނުގެ އަތޮޅުތަކަށް ގަޑިއަކު 10 އާއި 20 މޭލާ ދެމެދުގެ ބާރުމިނުގައި ވައި ޖެހޭނެ ކަމަށާއި، އެހެނިހެން ސަރަޙައްދުތަކަށް ގަޑިއަކު 8 އާއި 18 މޭލާ ދެމެދުގެ ބާރުމިނުގައި ވައި ޖެހޭނެ ކަމަށް ލަފާކުރެވޭ ކަމަށް ބަޔާންކޮށްފައިވެއެވެ.
މީގެ އިތުރުން، ރާއްޖޭގެ ކަނޑުތައް މެދުމިނުގެ ވަރަކަށް ގަދަވާނެ ކަމަށާއި، ރާޅުގެ އުސްމިން 2 އާއި 5 ފޫޓާ ދެމެދުގައި ހުންނާނެ ކަމަށްވެސް މެޓް އިން ލަފާކުރައްވާފައިވެއެވެ.
