ޑޮލަރު ގަތުމަށް ބޮޑު އަދަދެއްގެ ފޭކު ބޭންކު ސްލިޕެއް ބޭނުންކުރި މީހަކު ފުލުހުންގެ ބެލުމުގެ ދަށަށް ގެންގޮސްފިއެވެ. މި މައްސަލައިގައި ހައްޔަރުކުރެވުނު ފަރާތަކީ މާލޭގެ 27 އަހަރުގެ ޒައިދާން މުޙައްމަދު ޙާޝިމްއެވެ.
ކްރިމިނަލް ކޯޓުން ނެރުނު ބަންދު އަމުރުގައި ބަޔާންކޮށްފައިވާ ގޮތުގައި، ޒައިދާން ވަނީ މަކަރާއި ޙީލަތް ހަދައި، 28,000 ރުފިޔާއަށްވުރެ ގިނަ އަދަދެއްގެ ސައްހަ ނޫން ބޭންކު ސްލިޕެއް ބޭނުންކޮށްގެން ޑޮލަރު ގަނެފައެވެ.
ނަމަވެސް، އޭނާ ވަނީ އެ ފައިސާ އަނބުރާ ދައްކާފައިވާ ކަމަށާއި، ބާކީ ހުރި ފައިސާ އޭނާގެ އަނބިމީހާއާއި ޢާއިލާއިން ދައްކާނެ ކަމަށް ބުނެފައިވާކަން ބަންދު އަމުރުގައި ފާހަގަކޮށްފައިވެއެވެ.
މުޖުތަމަޢުގެ ސަލާމަތާއި ރައްކާތެރިކަމަށްޓަކައި، ޒައިދާން 15 ދުވަހުގެ މުއްދަތަށް ބަންދުގައި ބެހެއްޓުމަށް ކޯޓުން އަމުރުކޮށްފައިވެއެވެ.
