ސަރުކާރު ކޯލިޝަން ޕާޓްނަރެއްގެ ގޮތުގައި އޮތް ޕީޕީއެމް ސެނެޓްގެ ބައްދަލުވުމެއް މިއަދު ބާއްވާ ގޮތަށް ހަމަޖެހިއްޖެއެވެ.
މި ބައްދަލުވުން ބޭއްވުމަށް ހަމަޖެހިފައި ވަނީ މެންދުރު ފަހު 2:00 ގައި ވެރިކަން ކުރާ މައި ޕާޓީ، ޕީއެންސީ އޮފީހުގައެވެ.
މި ބައްދަލުވުމުގެ އެޖެންޑާ އަދި ހާމައެއް ނުކުރެއެވެ. އެކަމަކު، ބައެއް ނޫސްތަކުން ރިޕޯޓުކޮށްފައިވާ ގޮތުގައި އެޖެންޑާގައި އޮތީ ޕާޓީ އުވާލުމާ މެދު ގޮތެއް ނިންމުމެވެ.
ޕީޕީއެމްގެ ހިންގާ ގަވާއިދުގައި ބުނެފައިވާ ގޮތުން އެ ޕާޓީ ހިންގުމަށް ދަތިވާ ވަރަށް ޕާޓީ ގެ މާލީ ހާލަތު ދަށްވެ، ޕާޓީގެ ލީޑާޝިޕުން، ސެނެޓަށް ހުށަހަޅައި އެކަން ދިރާސާ ކުރުމަށް ފަހު ޕާޓީ އުވާލަން ޖެހޭ ކަމަށް ސެނެޓުގެ ހަތަރު ބައިކުޅަ ތިންބައިގެ އަގުލަބިއްޔަތުން ފާސްކޮށްފި ނަމަ ޕާޓީ އުވާލެވިދާނެއެވެ.
ޕީޕީއެމްގެ ސެނެޓުގައި މި ސަރުކާރުގެ ބައެއް ވަޒީރުން އެބަތިއްބެވިއެވެ. އޭގެ ތެރޭގައި ޑިފެންސް މިނިސްޓަރު ޣައްސާން މައުމޫނު އާއި ފިޝަރީޒް މިނިސްޓަރު އަހުމަދު ޝިޔާމް ހިމެނިވަޑައިގަންނަވައެވެ.
ޕީޕީއެމް އުވާލުމުގެ ވާހަކަތައް ދެކެވޭ އިރު ޕީއެންސީ އަށް މެމްބަރުން އިތުރު ކުރުމުގެ ބޮޑު ހަރަކާތެއް ވަނީ ފަށައިފައެވެ. ރައީސް އަދި ޕީއެންސީގެ ރައީސް ޑރ. މުހައްމަދު މުއިއްޒު އަންގަވާފައިވަނީ ރައްޔިތުންގެ މަޖިލިހުގެ ކޮންމެ މެމްބަރަކު ވެސް 300 މެމްބަރުން ޕީއެންސީއަށް ވެއްދުމަށެވެ.
ރައީސްގެ އެ އިރުޝާދުގެ ދަށުން މިހާތަނަށް އައިއިރު، މަޖިލިހުގެ ވަރަށް ގިނަ މެމްބަރުން ވަނީ 300 މެމްބަރުން ހަމަކޮށް، ޕީއެންސީއަށް ފޯމް ހުށަހަޅައިފައެވެ.
