ޑައިމޯފިން ޓްރެފިކްކުރުމުގެ ކުށް ސާބިތުވި ހަތަރު މީހަކު އުމުރު ދުވަހަށް ޖަލަށްލުމަށާއި ބޮޑު އަދަދަކުން ޖޫރިމަނާކުރުމަށް ކުރިމިނަލް ކޯޓުން ހުކުމް ކޮށްފިއެވެ. މި މައްސަލަ ބެއްލެވި ޤާޟީ އިސްމާޢިލް ޝަފީޢުގެ ޙުކުމުގައި، ގދ. ތިނަދޫ ރަންގަލް ހަސަން ލޫތު، ހުޅުމާލޭ ހަސަން ރަޝީދު، ތ. ތިމަރަފުށީ ވައިޓްރޯސް އިސްމާޢީލް ޝަރީފް އަދި މއ. ހަސްލަތު ޝާނިޔާ އިބްރާހީމް މި ހަތަރު މީހުން ކުށްވެރިވެއްޖެކަމަށް ކަނޑައަޅުއްވާފައި ވެއެވެ.
ޙުކުމުގައިވާ ގޮތުން، ހަސަން ލޫތު 25 އަހަރަށް ޖަލަށްލުމަށާއި ދެ މިލިއަން ރުފިޔާއިން ޖޫރިމަނާކޮށްފައިވާއިރު، ހަސަން ރަޝީދު 25 އަހަރަށް ޖަލަށްލުމަށާއި އެއް މިލިއަން ރުފިޔާއިން ވަނީ ޖޫރިމަނާކޮށްފައެވެ. އިސްމާޢީލް ޝަރީފާއި ޝާނިޔާ އިބްރާހީމް، 25 އަހަރަށް ޖަލަށްލުމަށާއި ފަސް ލައްކަ ރުފިޔާއިން ޖޫރިމަނާކުރުމަށްވެސް ހުކުމް ކޮށްފައި ވެއެވެ. މި ހަތަރު މީހުން މިހާތަނަށް ޖަލުގައި ހޭދަކޮށްފައިވާ މުއްދަތު ޙުކުމުން އުނިކުރުމަށްވެސް ކޯޓު ހުކުމުގައި ވެއެވެ.
މީގެއިތުރުން، މި މައްސަލައާ ގުޅިގެން ފުލުހުންގެ ބެލުމުގެ ދަށަށް ގެނެވުނު ޖުމްލަ 1,542,675 ރުފިޔާ ދައުލަތަށް ނެގުމަށްވެސް ކޯޓުން އަމުރުކޮށްފައިވެއެވެ. މި ފައިސާގެ ތެރެއިން 1,466,000 ރުފިޔާ ހޯދާފައިވަނީ މ. ބުރެވިމާގެއިން ކަމަށާއި، އަނެއް 76,675 ރުފިޔާ ހޯދާފައިވަނީ ރޭއަލި ގެސްޓްހައުސްއިން ކަމަށް ކޯޓުން ބުނެފައިވެއެވެ.
މި ފައިސާއަކީ ކުށްކޮށްގެން ހޯދާފައިވާ ފައިސާކަމަށް ކަނޑައަޅައި، އެހެންކަމުން މި ފައިސާ ދައުލަތަށް ނެގުމަށް ކޯޓުން އަމުރުކޮށްފައިވެއެވެ.
