ޑްރަގް ފަރުވާއަށް އެއްބާރުލުން ނުދޭ ފަރާތްތަކާމެދު ޤާނޫނީ ފިޔަވަޅު އެޅުމާއި ފަރުވާގެ ނިޒާމު ހަރުދަނާކުރުމަށް ނޭޝަނަލް ޑްރަގް އެޖެންސީ (އެންޑީއޭ)ގެ ބޯޑާއި ޑްރަގް ކޯޓާ ދެމެދު މަޝްވަރާކުރެވިފައިވާކަމަށް އެންޑީއޭއިން މިއަދު ހާމަކޮށްފިއެވެ.
މި މަޝްވަރާތަކުގައި ޑްރަގް ކޯޓުގެ ދަށުން ފަރުވާއަށް ޙުކުމްކުރެވި، ފަރުވާ ތަންފީޒުކުރަން ފެށުމަށްފަހު އެއްބާރުލުން ނުދޭ މީހުންނާމެދު ޢަމަލުކުރާނެ ގޮތްތަކާ ބެހޭގޮތުން ވާހަކަދެކެވިފައިވެއެވެ.
މީގެއިތުރުން، އެންޑީއޭގެ ޓެކްނިކަލް ކޮމިޓީއާއި ޑްރަގް ކޯޓު ގުޅިގެން ކުރާ މަސައްކަތްތަކުން އެދެވޭ ނަތީޖާ ނެރުމަށްޓަކައި ދެފަރާތުން އަދާކުރަންޖެހޭ ދައުރުތަކާ ބެހޭގޮތުންވެސް މަޝްވަރާކުރުމަށް ނިންމާފައިވާކަމަށް އެންޑީއޭއިން ބުނެފައިވެއެވެ. މި މަސައްކަތްތަކާ ގުޅިގެން، ރިހެބިލިޓޭޝަންގެ ނިޒާމު އިތުރަށް ހަރުދަނާކުރުމަށްޓަކައި ސަރުކާރުން ވަނީ ބަޖެޓުގައި އިތުރު 30 މިލިއަން ރުފިޔާ ހިމެނުމަށް ނިންމާފައެވެ.
އެންޑީއޭއިން ރިހެބިލިޓޭޝަން ޕްރޮގްރާމްތައް އިންތިޒާމްކޮށް ކުރިއަށް ގެންދާއިރު، އެ އިދާރާގެ މިއަހަރުގެ ބަޖެޓުގެ ގޮތުގައި ކަނޑައަޅާފައިވަނީ 117 މިލިއަން ރުފިޔާއެވެ. މި އިތުރުކުރެވޭ 30 މިލިއަން ރުފިޔާއާއެކު އެންޑީއޭގެ ބަޖެޓު އިތުރަށް ފުޅާވެ، ޑްރަގް ފަރުވާގެ ނިޒާމު ހަރުދަނާކުރުމަށް އިތުރު ފުރުޞަތުތަކެއް ހުޅުވިގެންދާނެކަމަށް ބެލެވެއެވެ.
