ބޭންކް އޮފް މޯލްޑިވްސް (ބީއެމްއެލް) ގެ ސީއީއޯގެ މަޤާމަށް އަހްމަދު ޝަރީފް އައްޔަންކުރުމަށް ނިންމައިފިއެވެ. މިއީ އެ ބޭންކުގެ ތާރީޚުގައި ފުރަތަމަ ފަހަރަށް ދިވެއްސަކު ސީއީއޯގެ މަޤާމަށް އައްޔަންކުރެވުނު ފުރަތަމަ ފަހަރެވެ.
ޝަރީފް ބީއެމްއެލް ގެ ސީއީއޯގެ މަޤާމަށް އައްޔަން ކޮށްފައި މިވަނީ ކުރިން އެ މަޤާމުގައި ހުންނެވި ކާލް ސްޓުމްކަ މިދިޔަ މަހުގެ 9 ވަނަ ދުވަހު އިސްތިއުފާ ދެއްވުމާ ގުޅިގެން، ސީއީއޯގެ މަޤާމު ހުސްވެފައިވަނިކޮށެވެ.
ބީއެމްއެލްއިން މިއަދު ނެރުނު ނޫސްބަޔާނުގައި ބުނެފައިވަނީ ޝަރީފް މާދަމާއިން ފެށިގެން މަޤާމާ ހަވާލުވެވަޑައިގަންނަވާނެ ކަމަށެވެ. މިއީ ބޭންކަށާއި ދިވެހިރާއްޖޭގެ މާލީ ދާއިރާއަށް ވެސް ހާސިލްކުރެވުނު މުހިންމު ލަނޑުދަނޑިއެއް ކަމަށް ބޭންކުން ފާހަގަކޮށްފައިވެއެވެ.
ޝަރީފަކީ ބީއެމްއެލްގައި 25 އަހަރަށްވުރެ ގިނަ ދުވަހު ޚިދުމަތްކުރައްވާފައިވާ ބޭފުޅެކެވެ. އޭނާ ބޭންކާ ގުޅިވަޑައިގަތީ 1995 ގައެވެ. ކުރިން ޑެޕިއުޓީ ސީއީއޯގެ މަޤާމުގައި ހުންނެވި ޝަރީފް، 2020 ގެ ފެބްރުއަރީގައި އިސްތިއުފާ ދެއްވިއެވެ. މީގެ އިތުރުން އޭނާ ވަނީ ރިޓެއިލް ބޭންކިންގ ޑައިރެކްޓަރުކަމާއި ޑައިރެކްޓަރ އޮފް އޮޕަރޭޝަންސްގެ މަޤާމުތައްވެސް އަދާކުރައްވާފައެވެ.
ޝަރީފް ވަނީ ޔުނިވަރސިޓީ އޮފް މެންޗެސްޓަރއިން މާލީ ދާއިރާއިން މާސްޓަރސް ޑިގްރީއެއް ހާސިލުކުރައްވާފައެވެ. އަދި ލަންޑަން ބިޒްނަސް ސްކޫލުން ސީނިއަރ އެގްޒެކެޓިވް ޕްރޮގްރާމްވެސް ފުރިހަމަކުރައްވާފައިވެއެވެ. 2018 އިން 2020 އަށް އޭނާ ވަނީ އޭޝިއަން ބޭންކަރސް އެސޯސިއޭޝަންގެ ވައިސް ޗެއަރމަންގެ މަޤާމުވެސް ފުރުއްވާފައެވެ.
ބީއެމްއެލްއިން ވަކިވެވަޑައިގަތުމަށްފަހު، ޝަރީފް ވަނީ އެގްޒެކެޓިވް މަޤާމުތަކާއި ކޮންސަލްޓަންޓެއްގެ ގޮތުގައި އަމިއްލަ ވިޔަފާރީގެ ދާއިރާގައި މަސައްކަތްކުރައްވާފައެވެ.
