އިދިކޮޅު އެމްޑީޕީގެ އެންމެ މެމްބަރެއް ފިޔަވާ އެހެން މެމްބަރުން ޓެކްސް ބޭސް ފުޅާކުރުމަށް ސަރުކާރުން ހުށަހަޅުވާފައިވާ ބިލާއި ދެކޮޅަށް ވާހަކަ ދައްކަވައިފިއެވެ.
މިއަދުގެ މަޖިލިގައި، ސަރުކާރުގެ ފަރާތުން ހުށަހަޅާފައި ޓެކްސް ބޭސް އިތުރަށް ފުޅާ ކުރުމާއި ގުޅޭ ބިލަށް ތާއީދުކޮށް ވަހަކަ ދައްކަވާފައިވާ އެމްޑީޕީއަށް ނިސްބަތްވާ މެމްބަރަކީ، ކެންދޫ ދާއިރާގެ މެންބަރު މައުރޫފް ޒާކިރުއެވެ. އޭނާ ވަނީ ޓުއަރިޒަމް ގުޑްސް އެންޑް ސަރވިސަސް ޓެކްސް (ޓީޖީއެސްޓީ) އަދި ގްރީން ޓެކްސް އިތުރުކުރުމަށް ސަރުކާރުން ހުށަހަޅާފައިވާ އިސްލާހުތަކަށް ތާއީދު ކޮށް ވާހަކަ ދައްކަވާފައެވެ.
ސަރުކާރުގެ ފަރާތުން މައްޗަންގޮޅި ދެކުނު ދާއިރާގެ މެންބަރު މުޞްޠަފާ ޙުސައިން ހުށަހެޅުއްވި ބިލަށް ވާހަކަދައްކަވަމުން މައުރޫފް ވިދާޅުވީ، ސަރުކާރުން މި އިސްލާހު ހުށަހަޅުއްވާފައިވަނީ ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކާ މަޝްވަރާކުރެއްވުމަށްފަހު ކަމަށާއި، އެކަމާ މެދު އެއްވެސް މައްސަލައެއް ނެތް ކަމަށެވެ.
ނަމަވެސް އޭނާ ވިދާޅުވީ، ކުއްލިއަކަށް މި ޓެކްސްތައް އިތުރުކުރުމުން، ޚާއްޞަކޮށް ފަތުރުވެރިންގެ އަތުން ނަގާ ފީތައް ވެސް އިތުރުކުރާނަމަ، ދަތިތަކެއް ކުރިމަތިވެދާނެ ކަމަށެވެ.
މެންބަރު މައުރޫފް ސަރުކާރުން ހުށަހެޅުއްވި އިސްލާހަށް ތާއީދުކުރެއްވި ނަމަވެސް، އެމްޑީޕީގެ އެހެން މެންބަރުން މި އިސްލާހުތަކަށް ތާއީދު ކޮށްފައެއް ނުވެއެވެ.
ހަނިމާދޫ ދާއިރާގެ މެންބަރު ޢަބްދުލްޣަފޫރު މޫސާ ވިދާޅުވީ މި އިސްލާހުތަކުގެ ސަބަބުން ރައްޔިތުންނަށް ފައިދާއެއް ނުކުރާނެ ކަމަށެވެ. އޭނާ ވިދާޅުވީ ސަރުކާރުން އޭގެ ޚަރަދުތައް ކުޑަ ނުކޮށް ހުރިހާ ޓެކްސްތަކެއް އިތުރުކުރިޔަސް އިޤްތިޞާދީ ގޮތުން އެއްވެސް ފައިދާއެއް ނުކުރާނެ ކަމަށެވެ.
ހިތަދޫ ދެކުނު ދާއިރާގެ މެންބަރު އަދި އެމްޑީޕީގެ ޕާލިމެންޓަރީ ގްރޫޕްގެ ލީޑަރު އިބްރާހީމް ނާޒިލް ވިދާޅުވީ ސަރުކާރުން ހުށަހަޅުއްވާފައިވާ ޓެކްސްއަށް ގެންނަން ސަރުކާރުން ހުށަހަޅާފައިވާ އިސްލާހުތައް ސާފު ނޫން ކަމުގައެވެ.
އޭނާ އިތުރަށް ވިދާޅުވީ ޓެކްސް ބޮޑުކުރުމުން ފަތުރުވެރިން އަންނަ މިންވަރު ބޮޑުތަނުން ދަށްވެގެންދާނެ ކަމަށެވެ.
ނާޒިލް ވިދާޅުވީ ޓެކްސް ބޮޑުކުރުމުން ދައުލަތަށް ކުރާނެ ފައިދާއަކީ ކޮބައިތޯ ރައްޔިތުން ސުވާލު އުފައްދަމުންދާ ކަމަށެވެ. އަދި އޭނާ ވިދާޅުވީ ސިޔާސީ މަޤާމުތަކަށް މީހުން ލައި މުސާރަ ދެމުންދާއިރު، ރަށްރަށުގެ މަޝްރޫޢުތައް ހުރީ ހުއްޓިފައި ކަމުގައެވެ.
ކޮމެންޓު ފޮނުވާ