ހުޅުމާލޭގައި ހިނގި ނުރައްކާތެރި އެކްސިޑެންޓަކާ ގުޅިގެން ޝަރީޢަތް ނިމެންދެން ބަންދުކޮށްފައި ހުރި ކާރުގެ ޑްރައިވަރު މުޙައްމަދު ވިސާމް ސިދުގީގެ ބަންދު ހައިކޯޓުން ވެސް ދަމަހައްޓައިފިއެވެ.
މި އެކްސިޑެންޓް ހިނގީ މިދިޔަ މަހުގެ 6 ވަނަ ދުވަހުގެ ރޭ ދަންވަރު، ހުޅުމާލޭ ސެންޓްރަލް ޕާކް ކައިރިން އުރީދޫ އޮފީސް އިމާރާތް ކުރިމަތީގައެވެ. މި ހާދިސާގައި ލ. އިސްދޫ، ބީޗް ހައުސްގެ 23 އަހަރުގެ ހަސަން ސަމާޙް ވަނީ ނިޔާވެފައެވެ.
އެކްސިޑެންޓް ހިނގި ދުވަހު 26 އަހަރުގެ ވިސާމް ވަނީ ހައްޔަރުކޮށްފައެވެ. ފުލުހުން ބުނެފައިވާ ގޮތުގައި އޭނާއަކީ ކާރު ދުއްވުމުގެ ލައިސަންސް އޮންނަ މީހެއް ނޫނެވެ.
ވިސާމްގެ ފަރާތުން ހައިކޯޓަށް ހުށަހެޅި މައްސަލައިގައި ބުނެފައިވަނީ، ހުޅުމާލޭގައި މިވަގުތު ކްރިމިނަލް ކޯޓުގެ ޑިވިޝަނެއް ހުންނާތީ ޖިނާއީ ތަބީޢަތުގެ މައްސަލައެއް ބެލުމުގެ އިޚްތިޞާޞް ހުޅުމާލެ ކޯޓަށް މިހާރު ލިބިގެންނުވާ ކަމަށެވެ. އަދި އޭނާގެ މައްޗަށް ކުރަނީ ގަސްތު މަރުގެ ތުހުމަތު ކަމަށްވާއިރު މެޖިސްޓްރޭޓް ކޯޓަކީ އެފަދަ މައްސަލަތައް ބެލުމުގެ އިޚްތިޞާޞް ލިބިގެންވާ ކޯޓެއް ނޫން ކަމަށްވެސް އޭނާ ބުނެފައިވެއެވެ.
ނަމަވެސް ހައިކޯޓުން ނިންމި ނިންމުމުގައި ބުނެފައިވަނީ ހުޅުމާލެ ކޯޓުން ވިސާމްގެ ބަންދު އަމުރު ނެރެފައިވަނީ ރަނގަޅަށް ކަމަށާއި އެ އަމުރު ބާޠިލުކުރަން ޖެހޭ ސަބަބެއް ނެތް ކަމަށެވެ.
ހައިކޯޓުން ފާހަގަކޮށްފައިވާ ގޮތުގައި ވިސާމަކީ ލައިސަންސް ނެތި ތަކުރާރުކޮށް ދުއްވުމުގެ ތާރީޚެއް އޮތް މީހެކެވެ. އަދި ދަށު ކޯޓުން އަމުރު ނެރެފައިވަނީ ވިސާމް ބާރު ސްޕީޑެއްގައި އުޅަނދު ދުއްވާފައިވުމުގެ މައްޗަށާއި އެކްސިޑެންޓްގެ ސަބަބުން މީހެއްގެ ފުރާނަ ގެއްލިފައިވުމުގެ މައްޗަށްކަން އެނގޭކަމަށް ހައިކޯޓުން ބުނެފައިވެއެވެ.
މީގެއިތުރުން، ޖިނާއީ އިޖުރާއަތުގެ ގަވާއިދުގައި ބަޔާންކޮށްފައިވާ ގޮތުން، ކުށުގެ ތުހުމަތުގައި މީހަކު ބަންދުކުރީ ހުޅުމާލޭ ސަރަޙައްދުން ނަމަ، އެ މީހަކު ބަންދުކުރާތާ 24 ގަޑިއިރުގެ ތެރޭގައި ބަންދާމެދު ގޮތެއް ނިންމުމަށްޓަކައި ހުޅުމާލޭ މެޖިސްޓްރޭޓް ކޯޓަށް ހާޒިރުކުރުމުގެ އިޚްތިޔާރު ލިބިގެންވާކަމަށް ހައިކޯޓުގެ ޙުކުމުގައި ބަޔާންކޮށްފައިވެއެވެ.
އެހެންކަމުން، ހުޅުމާލޭގައި ހުންނަ އިމާރާތެއްގައި ކްރިމިނަލް ކޯޓު ނުވަތަ އެ ކޯޓުގެ ބައެއް ހިންގާތީ، ހުޅުމާލެ މެޖިސްޓްރޭޓް ކޯޓުގެ އިޚްތިޞާޞްއަށް އެއްވެސް އަސަރެއް ކުރާނެ ކަމަކަށް ހައިކޯޓަށް ނުފެންނަ ކަމަށްވެސް ޙުކުމުގައި ބަޔާންކޮށްފައިވެއެވެ.
ކޮމެންޓު ފޮނުވާ