މި އަހަރުގެ ޖޫން މަހުގައި އިމިގްރޭޝަން ޤާނޫނަށް ބަދަލު ގެނައުމަށް ރައީސުލްޖުމްހޫރިއްޔާ ނިންމެވި ނިންމެވުމަށް ތާއީދުކުރާކަމަށާ، އަދި އިސްރާއީލުބޕާސްޕޯޓު ބޭންކުރުުން އަވަސްކުރުމަށް ވެރިކަންކުރާ ޕީއެންސީން ގޮވާލައިފިއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މި އަހަރުގެ ޖޫން މަހު އިމިގްރޭޝަން ޤާނޫނަށް ބަދަލު ގެނައުމަށް ނިންމެވި ނިންމެވުމަށް ތާއީދުކުރާކަމަށް ވިދާޅުވަމުން ޕީއެންސީން ނެރުނު ބަޔާނުގައި މަޖިލީހަށް ގޮވާލާފައިި ވަނީ، އިމިގްރޭޝަން ޤާނޫނަށް ގެންނަންޖެހޭ ބަދަލުތައް ވީހާވެސް އަވަހަށް ގެނައުމަކީ އެ ޕާޓީން ތާއީދުކުރާ ކަމެއްކަމުގައެވެ.
އަދި މިހާރު ރައްޔިތުންގެ މަޖިލީހުގައި އޮތް އިމިގްރޭޝަންގެ ޤާނޫނު އިޞްލާޙުކުރުމުގެ ބިލު އަވަހަށް ދިރާސާކޮށް ނިންމުމަށާއި، ރައްޔިތުންގެ ރޫޙާއި ވިންދާ އެއްގޮތަށް ރައީސުލްޖުމްހޫރިއްޔާގެ ނިންމެވުން ޙަޤީޤަތަކަށް ހެދުމަށް މަޖިލީހުން އަވަސްވެގަތުމަށް އިލްތިމާސްކޮށްފައިވެއެވެ.
މީގެއިތުރުން، އިސްރާއީލުން ފަލަސްޠީނުގެ ރައްޔިތުންނާމެދު ޣައްޒާއާއި ހުޅަނގު އައްސޭރީގައި ހިންގަމުންދާ އަނިޔާވެރި ޢަމަލުތަކާއި، ލުބުނާނުގެ ރައްޔިތުންނަށް ކުރިމަތިކުރަމުންދާ ދަތިތަކާ ގުޅިގެން، މި ޢަމަލުތަކާމެދު ނުރުހުން ފާޅުކުރުމަށް ރާއްޖެއިން އަޅަން ރައީސުލްޖުމްހޫރިއްޔާ ނިންމަވާފައިވާ ފިޔަވަޅަށްވެސް ޕާޓީން ފުރިހަމައަށް ތާއީދުކުރާކަމަށް ބަޔާނުގައި ބުނެފައިވެއެވެ.
މި ނިންމުންތަކަކީ ޤައުމީ މަޞްލަޙަތު ރައްކާތެރިކުރުމަށާއި، ބައިނަލްއަޤްވާމީ މުޖުތަމަޢުގައި ދިވެހިރާއްޖޭގެ މަޤާމު ހަރުދަނާކުރުމަށް އެޅޭ މުހިންމު ފިޔަވަޅުތަކެއްކަމަށް ޕާޓީން ދެކޭކަމަށް މި ބަޔާނުގައި ބުނެފައިި ވެއެވެ.
