އިލެކްޝަންސް ކޮމިޝަން (އީސީ) އިން މޯލްޑިވިއަން ރިފޯމް މޫވްމަންޓް (އެމްއާރްއެމް) އުވާލުމުގެ މަސައްކަތް ކުރަމުންދާއިރު، އެ ޕާޓީގެ އެއްވެސް ދަރަންޏެއް އޮތްނަމަ އަންނަ މަހުގެ 10 ގެ ކުރިން އެ ޕާޓީގެ އޮފީހަށް އަންގަން އެދިފައިވެއެވެ. އެމްއާރްއެމް އުވާލަން ނިންމީ 3،000 މެންބަރުން ހަމަވެފައިނުވާތީ ކަމަށް އީސީން ބުނެފައިވެއެވެ. މި މަސައްކަތް ފެށީ މިދިޔަ އޮގަސްޓް މަހުއެވެ.
އީސީގެ ވެބްސައިޓުގައިވާ ގޮތުން މިދިޔަ މަހުގެ 19 ވަނަ ދުވަހުގެ ނިޔަލާ ހަމައަށް އެމްއާރްއެމްގައި ތިބީ 2،231 މެންބަރުންނެވެ.
މިދިޔަ އަހަރު ތެރޭގައިވެސް އީސީން ވަނީ އެމްއާރްއެމްގެ މެންބަރުން ހަމަނުވާތީ ދެ ފަހަރެއްގެ މަތިން ނޯޓިސް ފޮނުވާފައެވެ. ނަމަވެސް، ޕާޓީ އުވާލި މައްސަލަ އެމްއާރްއެމްއިން ސިވިލް ކޯޓަށް ހުށަހެޅުމުން، ކޯޓުން ވަނީ އެ ނިންމުމަށް އަމަލު ނުކުރުމަށް ވަގުތީ އަމުރެއް ނެރެފައެވެ.
ސިވިލް ކޯޓުން މި އަހަރުގެ ފެބްރުއަރީ 13 ގައި ކުރި ހުކުމުގައި ބުނެފައިވަނީ އީސީން އެމްއާރްއެމްއަށް ފޮނުވި ނޯޓިހަކީ ސިޔާސީ ޕާޓީތަކުގެ ގާނޫނާ ހިލާފަށް ދީފައިވާ ނޯޓިހެއް ކަމަށެވެ. އަދި އެމްއާރްއެމް އުވާލަން އީސީން ނިންމާފައިވަނީ ގާނޫނު އަސާސީއާ ހިލާފަށް ކަމަށް ކަނޑައަޅައި، ޕާޓީ އުވާލުމަށް ނިންމި ނިންމުން ބާތިލުކޮށްފައިވެއެވެ.
ހުކުމުގައި އެމްއާރްއެމްއަށް ޝަރީއަތުގެ ހަރަދުގެ ގޮތުގައި 500،000 ރުފިޔާ ދިނުމަށް އީސީގެ މައްޗަށް ކަނޑައަޅާފައިވެއެވެ. އީސީން މި ހުކުމް އިސްތިއުނާފު ކުރާނެ ކަމަށް ބުނި ނަމަވެސް، އަދި މައްސަލަ ހައިކޯޓަށް ހުށަހަޅާފައެއް ނުވެއެވެ.
މިހާރު އީސީން އަލުން އެމްއާރްއެމް އުވާލުމުގެ މަސައްކަތް ފަށާފައިވާއިރު، އެ ޕާޓީގެ ދަރަންޏެއް އޮތްނަމަ އެކަން އަންގަން އެދިފައިވާކަން ފާހަގަކުރެވެއެވެ.
