"ވޭޕް ފްލޭވަރ" ގެ ނަމުގައި ކެނަބިސް އެތެރެކުރަން އުޅުނު މައްސަލަ ތަޙްޤީޤުކުރަން ފުލުހުން ފަށައިފިއެވެ. ހޯމް މިނިސްޓަރު އަލީ އިޙްސާން އެކްސްގައި ހާމަކުރެއްވި ގޮތުގައި "ވޭޕް އޮއިލް" ގެ ނަމުގައި ރާއްޖެއަށް އެތެރެކުރަން އުޅުނު މަސްތުވާތަކެތި ވަނީ އަތުލައިގަނެވިފައެވެ. މިއީ ކެނަބިސް އަޅާފައިވާ ޝިޕްމަންޓެއް ކަމަށް މިނިސްޓަރު ވިދާޅުވިއެވެ.
ފުލުހުން މީޑިއާއަށް ފޮނުވި މެސެޖެއްގައި ބުނެފައިވަނީ ކަސްޓަމްސްއިން އަތުލައިގަތް ޝިޕްމަންޓާ ގުޅޭ ތަޙްޤީޤެއް އެ އިދާރާއިން ކުރިއަށްގެންދާ ކަމަށެވެ. "ދިޔަރެސް" އިން މި މައްސަލައާ ގުޅޭ އިތުރު މަޢުލޫމާތު ހޯދަން މަސައްކަތްކުރުމުން، ފުލުހުން ބުނެފައިވަނީ އިތުރު ތަފްޞީލު ފަހުން ހާމަކުރާނެ ކަމަށެވެ.
މި ހާދިސާ ހިނގާފައިވަނީ ރާއްޖެއަށް ވޭޕް އެތެރެކުރުން މަނާކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވާފައިވާ ދުވަހާ ކައިރިވަމުންދާ ވަގުތެއްގައެވެ. އަންނަ މަހުގެ 15 ވަނަ ދުވަހުން ފެށިގެން ވޭޕްކުރާ ތަކެތި ބޭނުންކުރުމާއި، ގެންގުޅުމާއި، އުފެއްދުމާއި، ވިއްކުމާއި، އިޝްތިހާރުކުރުމާއި އަދި ހިލޭ ބެހުން މަނާކުރުމަށް ރައީސް ވަނީ ކަމާބެހޭ ފަރާތްތަކަށް އަންގަވާފައެވެ. މި ނިންމެވުމާއެކު، ވޭޕް ފްލޭވަރގެ ނަމުގައި ރާއްޖެއަށް މަސްތުވާތަކެތި އެތެރެކުރަން މަސައްކަތްކުރާ ފަރާތްތަކާ ދެކޮޅަށް ފިޔަވަޅު އެޅުމުގެ މަސައްކަތް ވަނީ ފެށިފައެވެ.
