ދުންފަތުގެ އިސްތިޢުމާލު ކުރަން އާދަވެފައިވާ ފަރާތްތަކުން އެ އާދައިން ދުރުވެގަތުމަށް އެހީތެރިވުމަށް ޤައުމީ ލެވެލްގައި، ފަންނީ ގޮތުން ބަލައިގަންނަ، ވަށާޖެހޭ، ބޮޑު ކެންޕޭނެއް ފެށުމަށް ވާނީ ނިންމަވާފައިވާކަން ރައީސް މުއިއްޒު ހާމަ ކުރައްވައިފިއެވެ. އެމަނިކުފާނު މިކަން ހާމަކުރައްވާފައިވަނީ މިއަދު ކުރެއްވި އެކްސް ޕޯސްޓެއްގައެވެ.
ރައީސް މުއިއްޒުގެ އެކްސް ޕޯސްޓުގައި ވަނީ ދިވެހިރާއްޖެއަކީ ދުންފަތުގެ އިސްތިއުމާލު ކުރުމުން ދުރުހެލިވެފައިވާ މުޖުތަމަޢަކަށް ހެދުމަށް ހުރިހާ ރައްޔިތުން އެއްބާރުލުން ބޭނުންފުޅުވާ ކަމަށް ވިދާޅުވެފައެވެ. އަދި ދުންފަތުގެ އިސްތިޢުމާލު ކުރުމުން ދުރުހެލިވުމަށް ސަރުކާރުން ޚާއްސަ ފިޔަވަޅުތަކެއް އަޅަން ނިންމާފައިވާކަންވެސް ރައީސްގެ އެކްސް ޕޯސްޓުގައި ވަނީ ހާމަކުރައްވާފައެވެ.
ރައީސް މުއިއްޒު ހާމަކުރައްވާފައިވާ ގޮތުގައި، މި ފިޔަވަޅުތަކުގެ ތެރޭގައި ސިގިރޭޓާއި ބިޑީގެ އަގު ބޮޑުކުރުމާއި، ޢާންމު ތަންތަނުގައި ދުންފަތުގެ އިސްތިޢުމާލުކުރުން ހުއްޓުވުމަށް މަސައްކަތްކުރުން ހިމެނެއެވެ.
ސަރުކާރުން ނިންމާފައިވާ ގޮތުގައި، 2024 ނޮވެމްބަރު 1 އިން ފެށިގެން ސިގިރޭޓާއި ބިޑިން ނަގާ އިމްޕޯޓް ޑިއުޓީގެ ސްޕެސިފިކް ރޭޓް 3 ރުފިޔާއިން 8 ރުފިޔާއަށް މަތިކުރެވޭނެއެވެ. އަދި މި މުދަލުން ނެގޭ އެޑްވެލޮރަމް ރޭޓް 50 އިންސައްތަ އިތުރުކުރެވޭނެއެވެ. މި ބަދަލުތައް ގެނައުމަށްޓަކައި އެކްސްޕޯޓް އިމްޕޯޓްގެ ޤާނޫނަށް އިސްލާހު ގެނައުމަށް މި ހަފްތާގައި މަޖިލީހަށް ބިލެއް ފޮނުވުމަށްވެސް ވަނީ ނިންމާފައެވެ.
މީގެ އިތުރުން، ޢާންމު ތަންތަނުގައި ދުންފަތުގެ އިސްތިޢުމާލުކުރުން ހުއްޓުވުމަށް ތަންފީޒީ އިދާރާތަކުގެ ދައުރު ވަރުގަދަކުރުމަށް ޚާއްސަ ފިޔަވަޅުތަކެއް އެޅުމަށްވެސް ސަރުކާރުން ވަނީ ނިންމާފައެވެ. އަދި ދުންފަތުގެ އިސްތިޢުމާލު ކުރަން އާދަވެފައިވާ ފަރާތްތަކަށް އެހީތެރިވުމުގެ ގޮތުން ޤައުމީ ފެންވަރުގައި ފަންނީ ގޮތުން ބަލައިގަންނަ، ވަށާޖެހޭ ބޮޑު ކެމްޕޭނެއް ފެށުމަށްވެސް ވަނީ ނިންމާފައެވެ.
މި ފިޔަވަޅުތަކަކީ ދިވެހިރާއްޖެ ދުންފަތުގެ އިސްތިޢުމާލުކުރުމުން ދުރުހެލިވެފައިވާ މުޖުތަމަޢަކަށް ބަދަލުކުރުމަށް އެޅޭ މުހިންމު ފިޔަވަޅުތަކެކެވެ. މި މަސައްކަތުގައި ހުރިހާ ރައްޔިތުންގެ އެއްބާރުލުމާއި އެހީތެރިކަން ބޭނުންވާނެ ކަމަށް ރައީސް އެކްސް ޕޯސްޓުގައި ވިދާޅުވެފައި ވެއެވެ.
