އައްޑޫ ސިޓީ މަރަދޫގެ ގެއެއްގައި މިއަދު އަލިފާން ރޯވުމުގެ ހާދިސާއެއް ހިނގައިފިއެވެ. މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) ގެ ރަސްމީ ވެބްސައިޓްގައި ޝާއިއުކުރި ޚަބަރެއްގައި ބުނެފައިވާ ގޮތުގައި، އަލިފާން ރޯވެފައިވަނީ އެގޭގައި ހުރި އޭސީތަކެއްގައެވެ.
އެމްއެންޑީއެފުން މަޢުލޫމާތު ދީފައިވާ ގޮތުގައި، އޭސީތަކުގައި އަލިފާން ރޯވިކަމުގެ ރިޕޯޓް އެމްއެންޑީއެފް ސަދަން އޭރިއާ، ހިތަދޫ ފަޔާ ސްޓޭޝަނަށް ލިބިފައިވަނީ މިއަދު ހަވީރު 17:13 ގައެވެ. މި ހާދިސާ ރިޕޯޓު ކުރެވުމާއެކު، ފަޔާ ފައިޓަރުން ވަނީ އެ ސަރަހައްދަށް ގޮސް އަލިފާން ނިއްވުމުގެ މަސައްކަތް ފަށާފައެވެ.
ފަޔާ ފައިޓަރުންގެ ހީވާގި މަސައްކަތުން، އެ އަލިފާންގަނޑު ނިއްވާލެވުނީ މިއަދު ހަވީރު 17:45 ހާއިރުގައި ކަމަށް އެމްއެންޑީއެފުން ބުނެފައިވެއެވެ. އަދި މި ހާދިސާގައި އެއްވެސް މީހަކަށް އަނިޔާވި ކަމުގެ ރިޕޯޓެއް ލިބިފައިނުވާ ކަމަށްވެސް އެމްއެންޑީއެފުން ވަނީ ހާމަކޮށްފައެވެ.
އެމްއެންޑީއެފުން ޝާއިއުކޮށްފައިވާ ފޮޓޯތަކުން ފެންނަ ގޮތުގައި، އެ ގޭގައި އަލިފާންގަނޑު ވަނީ ވަރަށް ބޮޑަށް ފެތުރިފައެވެ. މި ހާދިސާއާ ގުޅޭ އިތުރު ތަފްސީލު އަދި ލިބިފައެއް ނުވެއެވެ.
