ޑިޖިޓަލް ގޮތުން ކުރިއެރުމުގައި ޤައުމުތަކުގެ މެދުގައި ހުރި ފަރަގުތައް ކުޑަކުރުމަށް ޤާނޫނު ހަދާ މަޖިލިސްތަކުން މަސައްކަތް ކުރަންޖެހޭކަމަށް ރައްޔިތުންގެ މަޖިލީހުގެ ރައީސް އަބްދުއްރަޙީމް އަބްދުﷲ ވަނީ ވިދާޅުވެއްޖެއެވެ. އަބުދުއްތަހީމް މިފަދައިން ވިދާޅުވީ ޖެނީވާގައި ކުރިއަށްދާ އިންޓަ-ޕާލަމަންޓްރީ ޔޫނިއަން، އައިޕީޔޫގެ 149 ވަނަ އެސެމްބްލީގައި ބައިވެރިވެވަޑައިގެން ދެއްކެވި ވާހަކަފުޅުގައެވެ.
އެސެމްބްލީގެ މަޢުޟޫޢުއާ ގުޅޭގޮތުން ވާހަކަފުޅު ދައްކަވަމުން، މަޖިލީހުގެ ރައީސް ވަނީ އިއާދަކުރަނިވި ހަކަތައާއި ދެމެހެއްޓެނިވި ތަރައްޤީއަށް ދިވެހިރާއްޖެއިން ކުރާ މަސައްކަތްތަކަށް އަލިއަޅުއްވާލައްވާފައެވެ. އެގޮތުން ދިވެހިރާއްޖެ ފަދަ ކުދި ޖަޒީރާ ޤައުމުތަކަށް ދެމެހެއްޓެނިވި ގޮތެއްގައި ތަރައްޤީ ގެނައުމަށާއި ތިމާވެށި ޙިމާޔަތްކުރުމަށް ސައިންސާއި ޓެކްނޮލޮޖީގެ މުހިންމުކަން ފާހަގަކުރެއްވިއެވެ.
މޫސުމަށް އަންނަ ބަދަލުތަކުގެ ސަބަބުން ރާއްޖެއަށް ކުރިމަތިވާ ގޮންޖެހުންތަކާ ބެހޭގޮތުން ވާހަކަފުޅު ދައްކަވަމުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކޮޕް 28 ގައި އިޢުލާން ކުރެއްވި އިއާދަކުރަނިވި ހަކަތަ އިތުރުކުރުމާއި ގަސް އިންދުމުގެ ކެމްޕޭންގެ މުހިންމުކަން ފާހަގަކުރެއްވިއެވެ.
މީގެއިތުރުން، ޓެކްނޮލޮޖީ ކުރިއެރުވުމަށް ޤާނޫނުހަދާ މަޖިލިސްތަކުން އަދާކުރާ ދައުރުގެ މުހިންމުކަން ފާހަގަކުރައްވައި، ކޮވިޑުގެ ދުވަސްވަރު ރައްޔިތުންގެ މަޖިލިސް އޮންލައިންކޮށް ކުރިއަށް ގެންދިޔަކަމާއި، އައި.ސީ.ޓީ. އާ ގުޅޭ ދާއިމީ ކޮމިޓީއެއް މަޖިލީހުގައި ހިމެނޭކަން ފާހަގަކުރެއްވިއެވެ. އަދި ޑިޖިޓަލް އިޤްތިޞާދެއް އުފެއްދުމަށާއި ޢާންމު ޚިދުމަތްތައް ރަނގަޅުކުރުމަށް މަސްނޫޢީ ވިސްނުން ބޭނުންކުރުމަށް ރާއްޖެއިން ކުރާ މަސައްކަތްތަކަށް އަލިއަޅުއްވާލެއްވިއެވެ.
ދޮގު މަޢުލޫމާތާއި އޮޅުވާލުމުގެ ސަބަބުން ޑިމޮކްރަސީއަށް ކުރިމަތިވާ ގޮންޖެހުންތަކަށް ބައްލަވާލައްވައި، މިކަމުން ސަލާމަތްވުމަށް ޤާނޫނުހަދާ މަޖިލިސްތަކުގެ ދައުރު ފާހަގަކުރެއްވިއެވެ. އަދި އާ އީޖާދުތަކާއެކު އެކަށީގެންވާ ގަވާއިދުތައް އެކުލަވާލުމުގެ މުހިންމުކަމާއި، ސައިންސާއި ޓެކްނޮލޮޖީ ބޭނުންކުރުމުގެ ސުލޫކީ މިންގަނޑުތަކެއް ޤައުމުތަކުން އެކުލަވާލުމުގެ މުހިންމުކަން ފާހަގަކުރެއްވިއެވެ.
ތަޤްރީރު ނިންމަވާލައްވަމުން، މަޖިލީހުގެ ރައީސް ވަނީ ފަލަސްތީނާއި ލުބުނާނުގައި ހިނގަމުންދާ ހަމަނުޖެހުންތަކާމެދު ކަންބޮޑުވުން ފާޅުކުރައްވައި، ހަނގުރާމަ ވަގުތުން ހުއްޓާލުމަށް ގޮވާލައްވާފައެވެ. އަދި ސުލްޙަ ދެމެހެއްޓުމަށް ހުރިހާ ފަރާތްތަކުންވެސް އިސްކަންދިނުމަށް އިލްތިމާސްކުރެއްވިއެވެ.
