ދުނިޔޭގެ އިލެކްޓްރޯނިކްސް ކުނީގެ ދުވަސް ފާހަގަކުރުމުގެ ގޮތުން ވޭސްޓް މެނޭޖްމަންޓް ކޯޕަރޭޝަން (ވެމްކޯ) އިން މިއަދު ޚާއްޞަ ޙަރަކާތެއްގެ ގޮތުގައި އިލެކްޓްރޯނިކް ކުނި ހިލޭ އުކާލެދޭގޮތަށް ނިންމައިފިއެވެ. މި ޙަރަކާތުގެ ދަށުން މިއަދު ހެނދުނު 9:00 އިން ފެށިގެން ރޭގަނޑު 10:00 އާ ހަމައަށް މާލެ، ހުޅުމާލެ، އަދި ވިލިމާލޭގެ ޓްރާންސްފަރ ސްޓޭޝަންތަކުން އިލެކްޓްރޯނިކް ކުނި ހިލޭ އުކާލުމުގެ ފުރުޞަތު ރައްޔިތުންނަށް ލިބިގެންދާނެއެވެ.
ކޮންމެ އަހަރެއްގެ އޮކްޓޯބަރު 14 ވަނަ ދުވަހަކީ ދުނިޔޭގެ އިލެކްޓްރޯނިކް ކުނީގެ ދުވަހެވެ. މި ދުވަސް ފާހަގަކުރަން ފެށީ 2018 ވަނަ އަހަރުން ފެށިގެންނެވެ. ވޭސްޓް ފްރޮމް އިލެކްޓްރިކަލް އެންޑް އިލެކްޓްރޯނިކް އިކުއިޕްމަންޓް (ޑަބްލިޔުއީއީއީ) އިން މި ދުވަސް ތަޢާރަފުކުރުމުގެ މައިގަނޑު މަޤްޞަދަކީ އިލެކްޓްރޯނިކް ކުނި ރައްކާތެރި ގޮތުގައި އުކާލުމާއި ރީސައިކަލް ކުރުމުގެ މުހިންމުކަން ޢާންމުންނަށް އަންގައިދީ، އެކަމަށް ހޭލުންތެރިކުރުވުމެވެ.
އިލެކްޓްރޯނިކް ކުންޏަކީ ރައްކާތެރި ގޮތުގައި ނައްތާނުލައިފިނަމަ ތިމާވެއްޓަށް ބޮޑެތި ގެއްލުންތަކެއް ލިބިދާނެ ކުނީގެ ބާވަތެކެވެ. އެހެންކަމުން، މިފަދަ ކުނި އެކަށީގެންވާ ގޮތުގައި މެނޭޖްކުރުމަކީ ވަރަށް މުހިންމު ކަމެކެވެ.
ވެމްކޯއިން މިއަދު ހިންގާ މި ޙަރަކާތަކީ މި ދާއިރާއިން ރައްޔިތުން ހޭލުންތެރިކުރުވުމަށާއި، އިލެކްޓްރޯނިކް ކުނި ރައްކާތެރި ގޮތުގައި ނައްތާލުމަށް ބާރުއެޅުމުގެ ގޮތުން ކުރިއަށް ގެންދާ މުހިންމު މަސައްކަތެކެވެ.
