ރާއްޖޭގެ ލާމަރުކަޒީ ނިޒާމަށް ހުރަސްއެޅޭ ގޮތަށް ފާސްކުރެވެމުންދާ ގާނޫނުތައް އިސްލާހުކުރުމަށް އެމްޑީޕީގެ ކައުންސިލަރުން ގޮވާލައިފިއެވެ. އެމްޑީޕީގެ ކައުންސިލަރުން މިގޮތަށް ގޮވާލާފައިވަނީ ހދ. ކުޅުދުއްފުށީގައި ބޭއްވުނު 'ލާމަރުކަޒީ ގުޅުން – ކައުންސިލަރުންގެ ކޮންފަރެންސް' ގައި ބައިވެރިވި ކައުންސިލަރުން ވެފައިވާ އިގުރާރުގައެވެ.
އެ އިގުރާރުގައި ފާހަގަކޮށްފައިވާ ގޮތުގައި، 19 ވަނަ މަޖިލީހުން ގެނައި އިސްލާހުތަކުން ލާމަރުކަޒީ ގާނޫނު ހިންގުމަށް ހެޔޮ ބަދަލުތަކެއް އައި ނަމަވެސް، މިހާރުގެ މަޖިލީހުން ގެންނަމުންދާ ބަދަލުތަކުން ލާމަރުކަޒީ އުސޫލުން ހިންގުމަށް ހުރަސްއެޅެމުންދާ ކަމަށް ބުނެފައިވެއެވެ. އަދި މި ބަދަލުތައް ގެނެވެމުންދަނީ ކަމާގުޅުންހުރި ފަރާތްތަކުގެ ކަންބޮޑުވުންތަކަށް އެކަށީގެންވާ ސަމާލުކަމެއް ދިނުމެއް ނެތި ކަމަށްވެސް ފާހަގަކޮށްފައިވެއެވެ.
މި ކޮންފަރެންސްގައި ބޮޑު ތިލަދުންމައްޗަށް ނިސްބަތްވާ 55 ކައުންސިލަރުންނާއެކު، އެމްޑީޕީގެ އިސް ލީޑަރުންވެސް ބައިވެރިވެފައިވެއެވެ. މީގެ ތެރޭގައި ޕާޓީގެ އެޑްވައިޒަރީ ރައީސް އިބްރާހިމް މުހައްމަދު ސޯލިހު، ޗެއަރޕާސަން ފައްޔާޒު އިސްމާއީލް، ޕާޓީގެ ރައީސް އަބްދުﷲ ޝާހިދު، އަދި ކުރީގެ ވައިސް ޕްރެޒިޑެންޓް ފައިސަލް ނަސީމް ހިމެނެއެވެ.
ކޮންފަރެންސްގެ މަޤްޞަދުތަކުގެ ތެރޭގައި، އެމްޑީޕީގެ ސަރުކާރުން ކައުންސިލްތައް ބާރުވެރިކުރުމަށް ގާނޫނަށް ގެނެސްފައިވާ ބަދަލުތަކާއި، ކުރިއަށް އޮތްތަނުގައި ގެންނަން ރޭވިފައިވާ ބަދަލުތަކުގެ މަޢުލޫމާތު ހިއްސާކުރުން ހިމެނެއެވެ. މީގެ އިތުރުން، ކައުންސިލްތަކުގެ އިދާރީ އަދި މާލީ ހިންގުންތެރިކަން ހަރުދަނާކުރުމާ ގުޅޭގޮތުންވެސް ވަނީ މަޝްވަރާކުރެވިފައެވެ.
