ބޭންކް އޮފް މޯލްޑިވްސް (ބީއެމްއެލް) އިން އެ ބޭންކުގެ ކިޑްސް ސޭވާ އެކައުންޓްތަކަށް އައު ޕްރޮމޯޝަނެއް ތަޢާރަފުކޮށްފިއެވެ. މި ޕްރޮމޯޝަންގެ ދަށުން ދިވެހި ރުފިޔާ އެކައުންޓްތަކަށް ތިން ޕަސެންޓްގެ ފައިދާއާއި ޔޫއެސް ޑޮލަރު އެކައުންޓްތަކަށް 3.5 ޕަސެންޓްގެ ފައިދާ ލިބޭނެއެވެ. މިއީ މިހާރު ހުޅުވާފައިވާ އެކައުންޓުތަކަށާއި އަލަށް ހުޅުވާ އެކައުންޓުތަކަށް ލިބޭނެ ފައިދާއެކެވެ.
މީގެ އިތުރުން، ގުރުއަތުން ހޮވޭ ފަސް ފަރާތަކަށް ކޮންމެ އެކައުންޓަކަށް 10,000 ރުފިޔާ ޖަމާކޮށްދޭނެ ކަމަށާއި، އެކްޓިވް 20 އެކައުންޓަކަށް 2,500 ރުފިޔާ ކޮންމެ އަހަރަކު ޖަމާކޮށްދޭނެ ކަމަށް ބީއެމްއެލްއިން ބުނެފައިވެއެވެ.
ބީއެމްއެލްގެ ޑެޕިއުޓީ ސީއީއޯ އަދި އިންޗާރޖް އޮފް ދަ ބޭންކް އައިޝަތު ނޫރައްދީން ވިދާޅުވެފައިވަނީ، މި ބަދަލު ގެނެސްފައިވަނީ މުސްތަޤްބަލަށްޓަކައި ފައިސާ ރައްކާކުރުމަށް ހިތްވަރު ދިނުމަށާއި، ކުޑަކުދިންނަށް މާލީ ހުނަރުތައް ދަސްކޮށްދިނުމަށް ކަމަށެވެ. އަދި އަލަށް ހުޅުވާ ކޮންމެ ކިޑްސް ސޭވާ އެކައުންޓަކާއެކު ބެލެނިވެރިންނަށް ހިލޭ ރީލޯޑްކުރެވޭ މާސްޓާކާޑް ޕްރީޕެއިޑް ކާޑަކަށް އެދެވޭނެ ކަމަށްވެސް އޭނާ ވިދާޅުވިއެވެ.
ބީއެމްއެލްއިން އިތުރަށް ބުނެފައިވަނީ، މި އައު އިންޓަރެސްޓް ރޭޓްތަކާއި ފައިދާގެ ރޭޓްތައް ބީއެމްއެލް އިސްލާމިކް ކިޑްސް ސޭވާ އެކައުންޓްތަކަށްވެސް ހަމަޖެހިފައިވާ ކަމަށެވެ. މި ޕްރޮމޯޝަންގެ މަޤްޞަދަކީ ކުޑަކުދިންނަށް ފައިސާ ރައްކާކުރުމުގެ އާދަ އަށަގެންނެވުމާއި، ޒިންމާދާރު ގޮތެއްގައި ޚަރަދުކުރަން ދަސްކޮށްދިނުން ކަމަށް ބޭންކުން ބުނެފައިވެއެވެ.
