ހުޅުމާލޭގެ ދެވަނަ ފިޔަވަހީގެ ބީޗް ސަރަޙައްދުން ދިވެހި ރައްޔިތުންނަށް ޚާއްޞަކޮށްގެން އިތުރު 18 ބިން ވިއްކުމަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ވަނީ ހުޅުވާލައިފައެވެ. މި ފުރުޞަތުގައި ވިއްކުމަށް ހަމަޖެހިފައިވަނީ ބީޗްފްރަންޓް ދެ ބިމާއި ބީޗް ސައިޑް 16 ބިމެވެ.
އެޗްޑީސީން މަޢުލޫމާތު ދީފައިވާ ގޮތުގައި، މި ބިންތަކުގެ ބޮޑުމިނަކީ 1,864 އަކަފޫޓާއި 2,408 އަކަފޫޓާ ދެމެދުގެ އަދަދުތަކެކެވެ. ބިން ގަތުމަށް ޝައުޤުވެރިވާ ފަރާތްތަކަށް އެޗްޑީސީގެ ބިޑް ޕޯޓަލް މެދުވެރިކޮށް އެޕްލިކޭޝަން ހުށަހެޅުމުގެ ފުރުޞަތު ވަނީ ހުޅުވާލެވިފައެވެ.
މި ފުރުޞަތުގައި ދިވެހި އަމިއްލަ ފަރުދުންގެ އިތުރުން، 100 އިންސައްތަ ދިވެހިންގެ ހިއްސާ އޮންނަ ކުންފުނިތަކަށްވެސް ބައިވެރިވެވޭނެކަމަށް އެޗްޑީސީން ބުނެފައިވެއެވެ. ބިން ވިއްކުމުގެ މަސައްކަތް ކުރިއަށްދާނީ ދެ މަރުޙަލާއަކަށް ބަހާލައިގެންނެވެ. ފުރަތަމަ މަރުޙަލާގައި އެކްސްޕްރެޝަން އޮފް އިންޓަރެސްޓް (އީއޯއައި) ހުށަހެޅުމަށްފަހު، ދެވަނަ މަރުޙަލާގައި އެއް ބިމަކަށް އެކަކަށްވުރެ ގިނަ ފަރާތްތަކުން ކުރިމަތިލާފައިވާނަމަ، އެ ބިންތަކަށް ބިޑުކިޑުކުރުން ކުރިއަށްދާނެއެވެ.
ދިރިއުޅުމުގެ ބޭނުމަށް ހަމައެކަނި ދިވެހިންނަށް ވިއްކާ މި ބިންތަކުގެ އަގު ފެށޭނީ އަކަފޫޓަކަށް 4,000 ރުފިޔާއިންނެވެ. މި ފުރުޞަތު ހުޅުވާލުމުގެ މަޤްޞަދަކީ ދިވެހި ރައްޔިތުންނަށް ހުޅުމާލޭގެ ދެވަނަ ފިޔަވަހީގެ ޕްރީމިއަމް ސަރަޙައްދުން ބިން ގަތުމުގެ ފުރުޞަތު ފަހިކޮށްދިނުންކަމަށް އެޗްޑީސީން ބުނެފައިވެއެވެ.
މި މަޝްރޫޢުގެ ސަބަބުން ހުޅުމާލޭގެ ދެވަނަ ފިޔަވަހީގެ ތަރައްޤީއަށް އިތުރު ބާރެއް ލިބި، އެ ސަރަޙައްދުގެ އާބާދީ އިތުރުވެ، އިޤްތިޞާދީ ޙަރަކާތްތައް ފުޅާވެގެންދާނެކަމަށް ބެލެވެއެވެ.
