ރައްޔިތުންގެ މަޖިލީހުގެ ރައީސް އަބްދުއްރަހީމް ޢަބްދުﷲ އާއި މަޖިލީހުގެ އިތުރު ފަސް މެންބަރުން ވަނީ އިންޓަ-ޕާލަމެންޓަރީ ޔޫނިއަން (އައިޕީޔޫ) ގެ 149 ވަނަ އެސެމްބްލީގައި ބައިވެރިވުމަށް ޖެނީވާއަށް ފުރާވަޑައިގެންފައެވެ.
މި ދަތުރުގައި ބައިވެރިވެވަޑައިގަންނަވާ އެހެން މެންބަރުންގެ ތެރޭގައި މާފަންނު މެދު ދާއިރާގެ މެންބަރު އަސްމާ ރަޝީދު، ހުޅުދޫ ދާއިރާގެ މެންބަރު މުހައްމަދު ޝާހިދު، ވިލިމާލެ ދާއިރާގެ މެންބަރު މުހައްމަދު އިސްމާއީލް، ފުވައްމުލަކު މެދު ދާއިރާގެ މެންބަރު އަލީ ފަޒާދު އަދި ކަނޑިތީމު ދާއިރާގެ މެންބަރު އަމީން ފައިސަލް ހިމެނިވަޑައިގަންނަވައެވެ.
މިއަދުން ފެށިގެން މި މަހުގެ 17 ވަނަ ދުވަހުގެ ނިޔަލަށް ކުރިއަށްދާ މި އެސެމްބްލީގައި 150 އަށް ވުރެ ގިނަ ޤައުމުތަކުގެ މަޖިލިސްތަކުން ބައިވެރިވާނެ ކަމަށް ބެލެވެއެވެ. ބައިނަލްއަޤްވާމީ ފެންވަރުގައި ޕާލަމެންޓޭރިއަނުންގެ މެދުގައި ބާއްވާ އެންމެ މުހިންމު އެއް ބައްދަލުވުން ކަމުގައި ބެލެވޭ މި އެސެމްބްލީގައި ދިވެހިރާއްޖޭގެ ރައްޔިތުންގެ މަޖިލީހުގެ ވަފުދު ބައިވެރިވުމަކީ ޤައުމުގެ ޑިމޮކްރަސީ އިތުރަށް ހަރުދަނާކޮށް، ބައިނަލްއަޤްވާމީ މުޖުތަމަޢުގައި ދިވެހިރާއްޖޭގެ ދައުރު ފުޅާކުރުމަށް އެޅޭ މުހިންމު ފިޔަވަޅެއް ކަމުގައި ފާހަގަކުރެވެއެވެ.
މި ބައްދަލުވުމުގައި ބައިވެރިވެވަޑައިގަންނަވާ ދިވެހި ވަފުދުން އެހެން ޤައުމުތަކުގެ ޕާލަމެންޓޭރިއަނުންނާ ބައްދަލުކުރައްވައި، ތަޖުރިބާ ހިއްސާކުރެއްވުމުގެ އިތުރުން، ދިވެހިރާއްޖޭގެ ޑިމޮކްރެޓިކް ތަޖުރިބާތަކާއި ކާމިޔާބީތައް ހިއްސާކުރައްވާނެ ކަމަށް ބެލެވެއެވެ.
މީގެ އިތުރުން، މި ބައްދަލުވުމަކީ ދުނިޔޭގެ އެކި ކަންކޮޅުތަކުގެ ޕާލަމެންޓޭރިއަނުންނާއެކު ގުޅުން ބަދަހިކޮށް، މުހިންމު މަޝްވަރާތައް ކުރުމުގެ ފުރުޞަތެއް ކަމުގައިވެސް ފާހަގަކުރެވެއެވެ.
ކޮމެންޓު ފޮނުވާ