ހައްޖު ކޯޕަރޭޝަންގެ މެނޭޖިން ޑިރެކްޓަރު މުހައްމަދު ޝަކީލްގެ ނަމުގައި ސްކޭމް ކޯލްތަކެއް ކުރެވެމުންދާ ކަމަށް އޭނާ އަމިއްލައަށް ހާމަކޮށްފިއެވެ.
ޝަކީލް އެކްސްގައި ކުރި ޕޯސްޓެއްގައި ބުނެފައިވާ ގޮތުގައި، އަބްދުﷲ ރަޝީދު (ގ.ދަލާސްޓް، ފޯން ނަންބަރު 7610117) ކިޔާ މީހަކު ޝަކީލްގެ ނަމުގައި އެކި ފަރާތްތަކަށް ގުޅައި، ބޮޑެތި އަދަދުތަކުން ފައިސާ ހޯދަން މަސައްކަތްކުރަމުންދާ ކަމުގެ މަޢުލޫމާތު ލިބިފައިވާ ކަމަށް ވިދާޅުވިއެވެ.
ޝަކީލް އިތުރަށް އެދިފައިވަނީ އޭނާގެ ނަމުގައި ކުރާ މިފަދަ އެއްވެސް ފޯނު ކޯލަކަށް އިޖާބަ ނުދިނުމަށެވެ. އަދި މި މައްސަލަ ބަލައިދިނުމަށް އެދި މޯލްޑިވްސް ޕޮލިސް ސަރވިސްއަށް ހުށަހަޅާފައިވާ ކަމަށްވެސް އޭނާ ވިދާޅުވިއެވެ.
ސްކޭމްގެ މައްސަލަތައް އިންތިހާއަށް އިތުރުވެފައިވާ މި ދަނޑިވަޅުގައި، މިފަދަ ކަންކަން ހުއްޓުވުމަށް ފުލުހުން ގިނަގުނަ މަސައްކަތްތަކެއް ކުރަމުން ގެންދެއެވެ. މި މަސައްކަތުގެ ތެރެއިން، މިފަދަ މައްސަލަތައް ބަލައި އަވަސް ފިޔަވަޅު އެޅުމަށްޓަކައި ދާދިފަހުން އެންޓި-ސްކޭމް ސެންޓަރެއް ވެސް ގާއިމްކުރެވިފައިވެއެވެ.
މި ފިޔަވަޅުތަކުން، ސްކޭމްގެ މައްސަލަތައް ކޮންޓްރޯލްކުރުމަށް އެހީތެރިވެދޭނެ ކަމަށް އުންމީދު ކުރެވެއެވެ.
