ވައިގެ މަގުންނާއި ޕޯސްޓު މެދުވެރިކޮށް ރާއްޖެ އެތެރެކުރަން އުޅުނު 3.48 ކިލޯގެ މަސްތުވާތަކެތި ކަސްޓަމްސް އިން އަތުލައިގެންފިއެވެ.
ކަސްޓަމްސް އިން ބުނީ މަސްތުވާތަކެތީގެ ތެރެއިން 2.44 ކިލޯގެ މަސްތުވާތަކެތި އަތުލައިގަތީ މި މަހުގެ ފަސް ވަނަ ދުވަހު ވައިގެ މަގުން ރާއްޖެ އައި ބްރެޒިލް އަންހެނެއްގެ ލަގެޖުން ކަމަށެވެ. އެ ތަކެތި ޓެސްޓުކުރިއިރު، މަސްތުވާތަކެތީގެ ބާވަތެއް ކަމަށްވާ ކޮކެއިންއަށް ޕޮޒިޓިވްވެފައިވާ ކަމަށް ކަސްޓަމުން ބުންޏެވެ.
މި ތަކެތީގެ މަގުމަތީގެ އަގު ހަ މިލިއަނަށް އަރާނެ ކަމަށް ކަސްޓަމްސް އިން ލަފާކުރެއެވެ.
ޕޯސްޓު މެދުވެރިކޮށް ގެނައި ޕެކޭޖެއްގެ ތެރެެއިން 1.04 ގެ މަސްތުވާތަކެތި އަތުލައިގަތް އިރު، އެ ތަކެތި ޓެސްޓުކުރިއިރު، މަސްތުވާތަކެތީގެ ބާވަތެއް ކަމަށްވާ ހެރޮއިން އަށް ޕޮޒިޓިވްވެފައިވާ ކަމަށް ވެސް ކަސްޓަމުން ބުންޏެވެ.
މި ތަކެތީގެ އަގު 1،040،000ރ. އަށް އަރާ ކަމަށް ކަސްޓަމްސް އިން ބުންޏެވެ.
މަސްތުވާތަކެތި އެތެރެކުރި ބްރެޒިލްގެ އަންހެން މީހާ އާއި ޕޯސްޓުން ޕެކޭޖު ބަލައި ދިޔަ 40 އަހަރުގެ ދިވެހި ފިރިހެން މީހާވަނީ ހައްޔަރުކޮށްފައެވެ.
