ކ. ހުވަފެންފުށި ކައިރީގައި އޮންނަ ފިނޮޅަކަށް ދިޔަ ދަތުރެއްގައި ގެއްލުނު ތަސްލީމް މުހައްމަދު ހޯދުމަށް އިންޓަޕޮލްއިން ރީނދޫ ނޯޓިސްއެއް ނެރެފައިވެއެވެ.
މިދިޔަ އޮގަސްޓް 29 ވަނަ ދުވަހުގެ އިރުއޮއްސުމާ ދިމާކޮށް، އެންގޭޖްމަންޓް ޕާޓީއަކާއި އުފަން ދުވަސް ފާހަގަކުރުމަށް ތަސްލީމާއެކު 25 މީހުންގެ ގްރޫޕެއް ފިނޮޅަށް ދިޔައެވެ. ތަސްލީމް ގެއްލިގެން ރިޕޯޓުކުރެވުނީ އޭގެ އަނެއް ދުވަހުގެ މެންދުރު 1:30 ހާއިރުއެވެ.
އޭނާ ހޯދުމަށް އެމްއެންޑީއެފުން ވަނީ ފިނޮޅު ވަށައިގެން 5،000 އަކަފޫޓުގެ ސަރަހައްދަކާއި ފިނޮޅު ކައިރިން ކަނޑުގެ އަޑިން 3،000 އަކަފޫޓުގެ ސަރަހައްދެއް ބަލާފައެވެ. ނަމަވެސް، އޭނާ ގެއްލުނީ މޫދަށް ކަމެއް ކަށަވަރުވެފައެއް ނުވެއެވެ. އެހެންކަމުން، އޭނާ ހޯދުމުގެ އޮޕަރޭޝަން ލީޑުކުރަނީ ފުލުހުންކަމަށް އެމްއެންޑީއެފުން ބުނެފައިވެއެވެ.
ފުލުހުންގެ މަޢުލޫމާތު ދިނުމުގައި، ތަސްލީމް ހޯދުމަށް އިންޓަޕޯލްގެ ޔެލޯ ނޯޓިސް ނެރެފައިވަނީ މިދިޔަ މަހުގެ 12 ވަނަ ދުވަހު ކަމަށް ބުނެފައިވެއެވެ. އިންޓަޕޯލް މެދުވެރިކޮށް އާންމުކުރާ ނޯޓިސްތަކަކީ އިންޓަޕޯލްގެ މެމްބަރު ހުރިހާ ޤައުމަކުން ފެންނަ ގޮތަށް އާންމުކުރާ ނޯޓިސްތަކެއް ކަމަށާއި، ނަމަވެސް މި ނޯޓިސްތަކަކީ އާންމުންނަށް ފެންނަ ގޮތަށް އިންޓަޕޯލްގެ ވެބްސައިޓުގައި އާންމުކުރާ ނޯޓިސްތަކެއް ނޫންކަމަށްވެސް ފުލުހުން ހާމަކޮށްފައިވެއެވެ.
ރީނދޫ ނޯޓިސްއަކީ މީހަކު ގެއްލުމުން ނުވަތަ ވަގަށް ނެގުމުން އެ މީހަކާ ބެހޭ މަޢުލޫމާތު ހޯދުމަށް ނެރޭ ބައިނަލްއަޤްވާމީ ނޯޓިސްއެކެވެ. ކުރިން ދިވެއްސަކާ ބެހޭގޮތުން މިފަދަ ނޯޓިސްއެއް ނެރެފައިވަނީ ގެއްލިފައިވާ ނޫސްވެރިޔާ އަޙްމަދު ރިލްވާން ޢަބްދުﷲ ގެ މައްސަލައިގައެވެ.
ތަސްލީމްގެ މައްސަލައިގައި ސީރިއަސް ގިނަ ކަންތައްތަކެއް ހުރުމާއެކު، އެ މައްސަލަ ތަޙުޤީޤުކުރެވެމުންދަނީ ޖިނާއީ މައްސަލައެއްގެ ގޮތުގައެވެ.
ފުލުހުންގެ މަޢުލޫމާތުގައި، ތަސްލީމް އެ ދަތުރުގައި ބައިވެރިވީ ދަތުރު ރޭވި ފަރާތްތަކުގެ ރަޙްމަތްތެރިކަމުގައި، ޕާޓީއަށް ތައްޔާރުކުރާ ބެކްޑްރޮޕް އަދި ލައިޓިންގެ މަސައްކަތް ކުރުމަށް ކަމަށް ބުނެފައިވެއެވެ. އޭނާ އެންމެ ފަހުން ފެނިފައިވަނީ ގެއްލުނު ކަމަށް ރިޕޯޓުކުރެވުނު ދުވަހުގެ ހެނދުނު 7:45 އާއި 9:00 އާ ދެމެދުގައެވެ.
އޭނާ މާލެ ދާން ބޭނުންވާ ކަމަށް ބުނުމުން، މާލެއަށް ދިޔަ ލޯންޗެއްގައި ފޮނުވާލަން އުޅުނުއިރު ނުފެނުނު ކަމަށާއި، އެހެން ލޯންޗެއްގައި ދިޔަތޯ ބެލުމަށް އޭނާގެ ޢާއިލާއާ ގުޅައި މަޢުލޫމާތު ސާފުކުރި ކަމަށްވެސް ފުލުހުން ބުނެފައިވެއެވެ.
