މާލޭގެ މަގުތައް އެންމެންނަށް އަމާން އަދި ރައްކާތެރި ތަނަކަށް ހެދުމުގެ މަޤްޞަދުގައި މާލެ ޕޮލިސް ކޮމާންޑުން މިއަދު ޚާއްޞަ އޮޕަރޭޝަނެއް ފަށައިފިއެވެ. މި އޮޕަރޭޝަންގެ މައިގަނޑު އަމާޒަކީ ރައީސްގެ ނިންމެވުންތައް އިތުރަށް ހަރުދަނާކަމާއެކު ތަންފީޒުކުރުމެވެ. މިކަމަށްޓަކައި، މަގުމަތީގެ ޤާނޫނުތަކާއި ގަވާއިދުތައް ތަންފީޒުކުރުމުގެ މަސައްކަތް އިތުރަށް ހަރުދަނާކޮށް، މަގުމަތީގައި ފުލުހުން ހަރަކާތްތެރިވާ މިންވަރު އިތުރުކުރުމަށް ވަނީ ނިންމާފައެވެ.
މި ޚާއްޞަ އޮޕަރޭޝަން ފެށުމާއެކު، މާލެ ޕޮލިސް ކޮމާންޑުގެ އިސްވެރިންނާއި ވިންގުތަކުގެ ވެރިންގެ އިތުރުން، މާލެ ޕޮލިސްގައި މަސައްކަތްކުރާ އެންމެހައި އޮފިސަރުން މަގުމަތީ ޓްރެފިކް ބެލެހެއްޓުމުގެ މަސައްކަތުގައި ޢަމަލީގޮތުން ބައިވެރިވެފައިވެއެވެ.
މިއީ މާލޭގެ މަގުތަކުގެ ސަލާމަތާއި ރައްކާތެރިކަން އިތުރުކޮށް، ޤާނޫނާއި ގަވާއިދުތަކަށް ޙުރުމަތްތެރިކޮށް ހިތާ މުޖުތަމަޢުއެއް ބިނާކުރުމަށް އަޅާ މުހިންމު ފިޔަވަޅެއް ކަމުގައި ފުލުހުން ދެކެއެވެ. މި މަސައްކަތުގެ ސަބަބުން މާލޭގެ މަގުތަކުގައި ދިމާވާ އެކިއެކި މައްސަލަތައް މަދުވެ، ރައްޔިތުންނަށް އިތުރު ހިތްހަމަޖެހުމަކާއި ރައްކާތެރިކަމެއް ލިބިގެންދާނެ ކަމަށް ބެލެވެއެވެ.
