މާލެ ސިޓީ ކައުންސިލުން މާލޭގެ ކެރީއިންގ ކެޕޭސިޓީ އަދި އުޅަނދުފަހަރުގެ އުމުރު ކަނޑައެޅުމުގެ މަސައްކަތް ފަށައިފިއެވެ. މި މަސައްކަތަކީ މާލެފަހި ޕްރޮގްރާމްގެ ދަށުން އިސްކަންދީގެން ކުރިއަށް ގެންދާ މަޝްރޫޢެކެވެ.
މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނުން ކުރިން ނެރެފައިވާ ކެރީއިންގ ކެޕޭސިޓީ ކަނޑައެޅުމުގެ އުސޫލުތައް ތަންފީޛުކުރުމުގައި ކައުންސިލުތަކަށް ދިމާވި ގޮންޖެހުންތަކަށް ހައްލެއް ހޯދުމުގެ ގޮތުން، ގަވާއިދު އިޞްލާޙުކުރެވިފައިވެއެވެ. މި އިޞްލާޙުގެ ދަށުން، ކޮންމެ ރަށެއް ނުވަތަ ސިޓީއެއްގެ އުޅަނދު ކެޕޭސިޓީ އަދި ޕާކިންގ އޭރިއާގެ ނިސްބަތުން ބޭނުންކުރެވޭނެ އުޅަނދުތަކާއި އުޅަނދުގެ އަދަދު ކަނޑައެޅުމުގެ ފުރުޞަތު ލިބިގެންދިޔައެވެ.
މި އިޞްލާޙާ ގުޅިގެން، މާލެ ސިޓީ ކައުންސިލުން މާލެ ސަރަހައްދުގެ ކެރީއިންގ ކެޕޭސިޓީ އަދި އުޅަނދުތަކުގެ އުމުރު ކަނޑައެޅުމުގެ މަސައްކަތް ފަށާފައިވެއެވެ. މި މަސައްކަތުގެ ސަބަބުން މާލޭގެ މަގުތަކުގައި ދުއްވާ އުޅަނދުފަހަރުގެ އަދަދު އެކަށީގެންވާ މިންވަރަކަށް ބެހެއްޓުމަށް މަގުފަހިވެގެންދާނެއެވެ.
ކެރީއިންގ ކެޕޭސިޓީ ކަނޑައެޅުމުގެ މުހިންމު ފައިދާތަކުގެ ތެރޭގައި ޓްރެފިކް ތޮއްޖެހުން ކުޑަކުރުމާއި، މަގުމަތީގެ ރައްކާތެރިކަން އިތުރުވުމާއި، ތިމާވެށްޓަށް ކުރާ ނޭދެވޭ އަސަރު ކުޑަކުރުމާއި، އަދި ޕާކިންގ ޖާގައިގެ މައްސަލަ ހައްލުކުރުން ހިމެނެއެވެ. މީގެ އިތުރުން، މި ފިޔަވަޅުގެ ސަބަބުން ދަތުރުފަތުރުގެ ނިޒާމު ހަރުދަނާވެގެންދާނެއެވެ.
މި މަސައްކަތް ނިމުމުން، މާލޭގައި ދުއްވޭނެ އުޅަނދުފަހަރުގެ އަދަދާއި، އެ އުޅަނދުފަހަރުގެ އުމުރު ކަނޑައެޅި، އާންމުކުރެވޭނެ ކަމަށް ކައުންސިލުން މަޢުލޫމާތު ދީފައިވެއެވެ.
