ސްރީލަންކާގެ އައު ރައީސް އެގައުމުގައި ކުއްލި އާންމު އިންތިޚާބަކަށް މަގުފަހިކުރުމަށްޓަކައި ޕާލިމަންޓު އުވާލައްވާފައެވެ.
އެގޮތުން އަނޫރާ ކުމާރާ ދިސަނާޔަކޭ ވަނީ 225 މެންބަރުންގެ ޕާލިމަންޓު އުވާލައްވާފައެވެ. މި ޕާލިމަންޓުގައި އޭނާގެ ވައަތުފިޔައިގެ ފިކުރުގެ ނޭޝަނަލް ޕީޕަލްސް ޕަވަރ (އެންޕީޕީ) އިއްތިހާދަށް ލިބިފައިވަނީ އެންމެ ތިން ގޮނޑިއެވެ.
ސަރުކާރުގެ ރަސްމީ ގެޒެޓުގައި ޝާއިޢުކޮށްފައިވާ އިޢުލާނަކުން އަންގާފައިވާ ގޮތުގައި، މި އިންތިޚާބު ބޭއްވުމަށް ހަމަޖެހިފައިވަނީ ނޮވެމްބަރު 14 ވަނަ ދުވަހުއެވެ. މިއީ ކުރިން ކަނޑައަޅާފައިވާ ތާރީޚަށްވުރެ ގާތްގަނޑަކަށް އެއް އަހަރު ކުރިންނެވެ.
ރައީސް އަނޫރާ ކުމާރާ ދިސަނާޔަކޭ ވަނީ އަންގާރަ ދުވަހު އޭނާގެ އެކުވެރިޔާ ހަރިނީ އަމަރަސޫރިޔާ، ބޮޑުވަޒީރުކަމަށް ޢައްޔަންކުރައްވާފައެވެ. މިއީ އެޤައުމުގެ ތާރީޚުގައި އަންހެނަކު މި މަޤާމަށް ހޮވި ތިންވަނަ ފަހަރެވެ. ދިސަނާޔަކޭ ރައީސްކަމަށް ހޮވިވަޑައިގަތީ ހޮނިހިރު ދުވަހު ބޭއްވުނު ރިޔާސީ އިންތިޚާބުގައެވެ.
އޭނާ ވަނީ ރައީސްކަމަށް ހޮވުމާއެކު، އޭނާގެ ސިޔާސަތުތައް ކުރިއަށް ގެންދިއުމަށް އައު މެންޑޭޓެއް ހޯދުމަށް ޕާލިމަންޓު އަވަހަށް އުވާލާނެކަމުގެ އިޝާރާތްކުރައްވާފައެވެ. އޭނާ ކުރިން ވިދާޅުވެފައިވަނީ "ރައްޔިތުން ބޭނުންވާ ގޮތާ އެއްގޮތަށް ނޫން ޕާލިމަންޓެއް ދެމެހެއްޓުމުގެ ބޭނުމެއް ނެތް" ކަމަށެވެ.
ފަސް އަހަރުގެ ދައުރަކަށް މެންބަރުން އިންތިޚާބުކުރާ ސްރީލަންކާގެ އެންމެ ފަހުގެ އާންމު އިންތިޚާބު ބޭއްވުނީ 2020 ވަނަ އަހަރުގެ އޯގަސްޓު މަހުގައެވެ.
