އައްޑޫ ސިޓީއިން ގެއްލިގެން ހޯދަމުންދިޔަ މީހާ ފެނިއްޖެ

ސ. މަރަދޫއިން ރޭގެ ވަގުތެއްގައި ގެއްލިގެން ހޯދަމުންދިޔަ މީހާ މިއަދު ހަވީރު ފެނިއްޖެއެވެ.

އައްޑޫ ސިޓީ މަރަދޫ އަޙްމަދު ހާރޫން ގެއްލިގެން ހޯދަމުންދާކަމަށް ފުލުހުންނަށް ރިޕޯޓުކުރެވުނީ މިއަދުގެ މެންދުރު ވަގުތެއްގައެވެ.

ފުލުހުންގެ މަޢުލޫމާތުގައިވާ ގޮތުން، އިއްޔެ ރޭ 19:00 ގައި ގެއިން ނުކުމެގެން ދިޔަ ސ. މަރަދޫ ފިރިހެނަކު ގެއަށް ނައިސް ގެއްލިގެން އުޅޭ މައްސަލަ މިއަދު މެންދުރު 13:30 ހާއިރު ފުލުހުންނަށް ރިޕޯޓުކުރެވުނެވެ.

ފުލުހުން ހާމަކުރި ގޮތުގައި ހާރޫން ފެނުނީ އޭނާ ދިރިއުޅޭ ގޭގެ ގޯތިތެރޭގައި ވަކިން ހުންނަ ކޮޓަރިއެއްގެ ތެރެއިން މިއަދުގެ 17:05 ހާއިރުއެވެ.

މިވަގުތު ހާރޫނުގެ ޞިއްޙީ ހާލަތު ބެލުމަށްޓަކައި މަރަދޫ ހެލްތު ސެންޓަރަށް ގެންދެވިފައިވާކަމަށްވެސް ފުލުހުން މަޢުލޫމާތު ދެއެވެ.