ފުލުހުންގެ ބެލުމުގެ ދަށަށް ގެންދެވޭ އެއްގަމު އުޅަނދުފަހަރު ދެން އަނބުރާ ދޫކުރެވޭނީ އެ އުޅަނދެއްގެ ރަޖިސްޓްރީ ނަންބަރު ރަނގަޅުކޮށް، އަދި އެ އުޅަނދެއް ރަޖިސްޓްރީކޮށްފައިވާ ޒޯނަކަށް އަނބުރާ ގެންދާކަން ކަށަވަރުކުރުމަށްފަހުގައިއެވެ.
ޤާނޫނު ނަންބަރު 2009/5 (އެއްގަމު ދަތުރުފަތުރުގެ ޤާނޫނު) އާއި އެ ޤާނޫނުގެ ދަށުން އެކުލަވައިލައިފައިވާ ގަވާއިދާ ޚިލާފަށް ރަޖިސްޓްރީ ނަންބަރެއް ހަރުކޮށްގެން ނުވަތަ ރަޖިސްޓްރީ ނަންބަރެއް ހަރުނުކޮށް ދުއްވައިފައިވާ އުޅަނދެއް ހިފަހައްޓައިފި ނަމަ، އެ އުޅަނދެއް އަނބުރާ ހަވާލުކުރެވޭނީ ވަކި ޝަރުތުތަކަކާ އެކުގައެވެ. މިފަދަ އުޅަނދުތައް އަނބުރާ ހަވާލުކުރެވޭނީ އެއްގަމު ދަތުރުފަތުރުގެ ޤާނޫނާއި ގަވާއިދާ އެއްގޮތްވާ ގޮތުގެ މަތީން 30 ދުވަހުގެ މުއްދަތުގެ ތެރޭގައި އެ އުޅަނދެއް ރަޖިސްޓްރީކޮށް ނިމުމުންނެވެ.
މި އައު އުސޫލުގެ މަޤްޞަދަކީ މަގުމަތީގައި ދުއްވާ އުޅަނދުފަހަރުގެ ރަޖިސްޓްރޭޝަން ހަރުދަނާކޮށް، ޤާނޫނާއި ގަވާއިދާ އެއްގޮތަށް އުޅަނދުފަހަރު ދުއްވުން ކަށަވަރުކުރުމެވެ. މީގެ ސަބަބުން މަގުމަތީގެ ސަލާމަތާއި ރައްކާތެރިކަން އިތުރުވެ، ޓްރެފިކް ބެލެހެއްޓުމަށް ފަސޭހަވެގެންދާނެއެވެ.
