ހުޅުމާލޭގައި އަލަށް ތައްޔާރުކޮށްފައިވާ ޕާކިން ޖާގަތަކަށް އެދި ހުށަހެޅުމުގެ ފުރުޞަތު އެޗްޑީސީން މިއަދު ހުޅުވާލައިފިއެވެ. މި ޕޮކެޓް ޕާކިން ޖާގަތައް އަށް ޒޯނަކަށް ބަހާލައިގެން ޖުމްލަ 1،374 ޖާގަ ތަރައްޤީކޮށްފައިވެއެވެ. ކޮންމެ ޖާގައެއްގެ މަހު ކުލި 2000 ރުފިޔާގައި ހަމަޖައްސާފައިވާއިރު، މި ޖާގަތަކުގައި ކާރާއި ޕިކަޕް ފަދަ ހަތަރު ފުރޮޅުލީ އުޅަނދުތައް ބޭއްވޭނެއެވެ.
18 އަހަރުން މަތީގެ ކޮންމެ ދިވެއްސަކަށްވެސް މި ޕާކިން ޖާގަތަކަށް ކުރިމަތިލެވޭނެ ނަމަވެސް، ޝަރުތުތަކެއް ފުރިހަމަވާންޖެހެއެވެ. މިގޮތުން އެދޭ ފަރާތުގެ ނަމުގައި މާލޭ ސަރަހައްދަށް ރަޖިސްޓްރީކޮށްފައިވާ ކެޓަގަރީ B1 ނުވަތަ C1 ގެ ވެހިކަލްއެއް އޮންނަންޖެހޭނެއެވެ. އަދި ޕާކިން ހޯދަން އެދޭ ފަރާތަކީ މާލޭ ސަރަހައްދުގައި ދިރިއުޅޭ މީހަކަށްވެސް ވާންޖެހެއެވެ.
ޕާކިން ޖާގަތައް ދޫކުރުމުގައި އިސްކަންދޭނެ ތަރުތީބުވެސް އެޗްޑީސީން ހާމަކޮށްފައިވެއެވެ.
އެންމެ ފުރަތަމަ އިސްކަންދޭނީ ހުޅުމާލެއަށް ރަޖިސްޓްރީކޮށްފައިވާ ވެހިކަލްތަކަށެވެ. އޭގެ ފަހުން، މާލޭ ސަރަހައްދުގެ އެހެނިހެން ސަރަހައްދުތަކަށް ރަޖިސްޓްރީކޮށްފައިވާ ވެހިކަލްތަކަށް ޖާގަ ދޫކުރުމަށް ވަނީ ނިންމާފައެވެ.
މިއީ ހުޅުމާލޭގެ ޕާކިން މައްސަލައަށް ޙައްލެއް ހޯދުމަށް އެޗްޑީސީން އަޅާފައިވާ މުހިންމު ފިޔަވަޅެކެވެ.
މި ދެ ކެޓަގަރީންވެސް ޕާކިން ޖާގަ ދޫކުރުމުގައި އިސްކަންދޭ ތަރުތީބަކީ:
1. ޕާކިން އެޕްލިކޭޝަން ހުށަހަޅާފައިވާ ޒޯންގައި ދިރިއުޅޭ ހުޅުމާލޭގެ ރައްޔިތުން
2. ޕާކިން އެޕްލިކޭޝަން ހުށަހަޅާފައިވާ ޒޯން ނޫން އެހެން ޒޯނެއްގައި ދިރިއުޅޭ ހުޅުމާލޭ ރައްޔިތުން
3. މާލޭ ސަރަހައްދުގައި (ހުޅުމާލެ ނުހިމަނާ) ދިރިއުޅޭ ރައްޔިތުން
