ބަންކަރިންގ ޚިދުމަތުގެ ދެވަނަ ފިޔަވަހީގެ ދަށުން އިހަވަންދިއްޕޮޅުގައި ތަރައްޤީގެ ބިޔަ މަޝްރޫޢުތަކެއް ފެށުމަށް ތައްޔާރުވެފައިވާއިރު، ބަންކަރިންގެ ޚިދުމަތް ފެށުމުން އެމްޕީއެލް އިން މެރިޓައިމްގެ 14 ހިދުމަތެއް ބޯޓުތަކަށް ފޯރުކޮށްދޭނެ ކަމަށް، މޯލްޑިވްސް ޕޯޓްސް ލިމިޓެޑް (އެމްޕީއެލް)ގެ ސީއީއޯ މުޙައްމަދު ވަޖީހު ވިދާޅުވެއްޖެއެވެ.
އިހަވަންދިއްޕޮޅުގައި ފަށާ ބަންކަރިން ޚިދުމަތުގެ ދަށުން، ހއ. ހޯރަފުށީފަޅު ހިއްކައި، އެތަނުގައި ތެޔޮ ޓާމިނަލަކާއި ބައިނަލްއަޤްވާމީ ފެންވަރުގެ ކޮންޓެއިނަރ ޓާމިނަލެއް ތަރައްޤީކުރުން ހިމެނެއެވެ. އަދި އިހަވަންދިއްޕޮޅުގައި ކްރޫޒް ޓާމިނަލެއް ގާއިމުކުރުމަށްވެސް ނިންމާފައިވާ ކަމަށް ވަޖީހު ހާމަކުރެއްވިއެވެ.
ވަޖީހު އިތުރަށް ވިދާޅުވީ، އުލިގަމަކީ ގިނަ އަދަދެއްގެ ޔޮޓުތައް ދަތުރުކުރާ ރަށަކަށްވާތީ، ޔޮޓު މެރީނާ ހަދާނީ އުލިގަމުގައި ކަމަށާއި، މި މަޝްރޫޢަށް ހަ ފަރާތަކުން ޝައުޤުވެރިކަން ފާޅުކޮށްފައިވާ ކަމަށެވެ. އިހަވަންދިއްޕޮޅު ސަރަޙައްދަކީ ބޮޑެތި ކާގޯ ބޯޓުތައް ދަތުރުކުރާ ސަރަޙައްދަކަށްވާތީ، އެ ސަރަޙައްދުގައި ކާގޯގެ ޚިދުމަތަކީވެސް މުހިންމު ޚިދުމަތެއްކަމުގައި އޭނާ ފާހަގަކުރެއްވިއެވެ.
އޭނާ އިތުރަށް ވިދާޅުވީ، އެ ސަރަޙައްދުގައި ބިޒްނަސް ސެންޓަރެއް ގާއިމުކުރުމަށް ރޭވިފައިވާ ކަމަށާއި، ވިޔަފާރީގެ އުސޫލުން ޝައުޤުވެރިވާ ފަރާތްތަކަށް އެތަންތަން ކުއްޔަށްވެސް ދޫކުރެވޭނެ ކަމަށެވެ. އުތުރުގައި ފަށަން ނިންމާފައިވާ ބަންކަރިންގ ޚިދުމަތް މި މަހުގެ 19 ވަނަ ދުވަހު ފެށުމަށް މިހާރު ތައްޔާރުވަމުންދާ ކަމަށާއި، ޚިދުމަތް ފެށުމުން އެމްޕީއެލްއިން މެރިޓައިމްގެ 14 ޚިދުމަތެއް ބޯޓުތަކަށް ފޯރުކޮށްދޭނެ ކަމަށްވެސް އޭނާ ހާމަކުރެއްވިއެވެ.
މި މަޝްރޫޢުގެ ދަށުން، ޕައިލެޓޭޖް، ކްރޫ ބަދަލުކުރުން، ކާބޯތަކެތި ފޯރުކޮށްދިނުން، މެއިންޓަނަންސް އަދި ޓަގް ޚިދުމަތް ފަދަ ޚިދުމަތްތައް ލިބެން ހުންނާނެ ކަމަށް ވަޖީހު ވިދާޅުވިއެވެ. މި މަޝްރޫޢަކީ އިހަވަންދިއްޕޮޅަށް ތަރައްޤީގެ ބޮޑެތި ބަދަލުތަކެއް ގެނެސްދޭނެ މަޝްރޫޢެއްކަމަށް އޭނާ ފާހަގަކުރެއްވިއެވެ.
މޯލްޑިވްސް އިކޮނޮމިކް ގޭޓްވޭ ޕްރޮޖެކްޓްގެ ދަށުން އިހަވަންދިއްޕޮޅުގައި ބަންކަރިންގ ޚިދުމަތް ފެށުމަށްޓަކައި، އެސްޓީއޯ އާއި ވިޓޯލް ގްރޫޕާ ދެމެދު މިދިޔަ މާރޗް 13 ވަނަ ދުވަހު އެއްބަސްވުމެއްގައި ސޮއިކުރެވިފައިވެއެވެ. ވިޓޯލްއަކީ ހަކަތައިގެ ވިޔަފާރީގައި ދުނިޔޭގައި އެންމެ ބޮޑު އެއް ކުންފުންޏެވެ.
ވިޓޯލްގެ އޮފީސްތައް ދުނިޔޭގެ 40 ޤައުމެއްގައި ހުރިއިރު، މި ކުންފުނިން އަހަރަކު 12 މިލިއަން ޓަނު ތެޔޮ ބަންކަރ ފިއުލްގެ ގޮތުގައި ވިއްކައެވެ. ވިޓޯލް ބަންކަރސްގެ މެޕުގައި ރާއްޖެ މިހާރު ހިމަނާފައިވާއިރު، ރާއްޖެ އޮންނަ ސަރަޙައްދަކީ ކަނޑު ބޯޓުތައް އާންމުކޮށް ދަތުރުކުރާ ހިސާބެކެވެ.
