ކުންފުނިތަކުގެ ޚާއްޞަ އާންމު ޖަލްސާ (އީޖީއެމް) ތަކަށް ނޯޓިސް ދިނުމުގެ މުއްދަތު 10 ދުވަހަށް ކުރުކުރެވޭގޮތަށް ސަރުކާރުން ކުންފުނިތަކުގެ ޤާނޫނަށް އިޞްލާޙެއް ހުށަހަޅުއްވާއިފިއެވެ. މި އިޞްލާޙުގެ ދަށުން ކުންފުނިތަކުގެ އާންމު ޚާއްޞަ ޖަލްސާތަކަށް (އީޖީއެމް) ނޯޓިސް ދިނުމުގެ މުއްދަތު 10 ދުވަހަށް ކުރުކު ކުރެވިގެން ދާނެއެވެ.

މި ބިލު މަޖިލީހަށް ހުށަހަޅުއްވާފައިވަނީ ފޭދޫ ދާއިރާގެ މެންބަރު އިސްމާޢީލް ނިޒާރެވެ.

މިހާރު ޗުއްޓީގައިވާ މަޖިލީހުން ވަނީ މިދިޔަ ހަފްތާގައި ދައުރުން ބޭރުގެ ޖަލްސާއެއް ބާއްވައި، މި ބިލު އަޑުއެހުމަށްފަހު، ހޯމަ ދުވަހުގެ ހެނދުނު ބޭއްވުނު އިތުރު ދައުރުން ބޭރުގެ ޖަލްސާއެއްގައި އިޤްތިޞާދީ ކޮމިޓީއަށް ފޮނުވާފައެވެ.

މި ބިލު ހުށަހެޅިފައިވަނީ، މިނިސްޓްރީ އޮފް ފިނޭންސްގެ އިރުޝާދުގެ ދަށުން ބޭންކް އޮފް މޯލްޑިވްސް (ބީއެމްއެލް) އިން ސެޕްޓެމްބަރު 21 ގައި އީޖީއެމްއެއް ބޭއްވުމަށް ހަމަޖެހިފައިވާ ދަނޑިވަޅުގައެވެ. މި އީޖީއެމްގެ ބޭނުމަކީ ބޭންކުގެ ބޯޑަށް ގެންނަން ބޭނުންވާ ބަދަލުތަކަށް ހުއްދަ ހޯދުމެވެ.

ބިލުގައި ބަޔާންކޮށްފައިވާ ގޮތުގައި، އީޖީއެމްއެއް ބޭއްވުމަށް ލިޔުމުން އެދޭތާ ތިން ދުވަހުގެ ތެރޭގައި އެ ބައްދަލުވުމުގެ ނޯޓިސް ދޭންވާނެއެވެ. އަދި 10 ދުވަހުގެ ތެރޭގައި އެ ބައްދަލުވުން ބާއްވަންވާނެއެވެ.

މިހާރު ޢަމަލުކުރަމުންދާ ޤާނޫނުގައި ބަޔާންކޮށްފައިވާ ގޮތުން، އީޖީއެމްއެއް ބޭއްވުމަށް ލިޔުމުން އެދޭތާ 21 ދުވަހުގެ ތެރޭގައި ނޯޓިސް ދޭންވާނެއެވެ. އަދި ތިން މަސްދުވަހުގެ ތެރޭގައި އެ ބައްދަލުވުން ބާއްވަންވާނެއެވެ.

ހޯމަ ދުވަހު ބޭއްވުނު ބިލުގެ އިބްތިދާއީ ބަހުސްގައި، ދިއްގަރު ދާއިރާ ތަމްސީލުކުރައްވާ މަޖިލީހުގެ ނައިބު ރައީސް އަޙްމަދު ނާޒިމް ވަނީ ބީއެމްއެލްގެ ސީއީއޯ ކާރލް ސްޓަމްކެ ސެޕްޓެމްބަރު 8 ގައި އިސްތިއުފާ ދެއްވާފައިވާކަން ފާހަގަކުރައްވާފައެވެ. މިކަން ހިނގާފައިވަނީ އީޖީއެމް ބޭއްވުމުގެ ކުރިންނެވެ.

"އައު ސީއީއޯއެއް އައްޔަންކުރުމަށް އަވަހަށް އީޖީއެމްއެއް ބާއްވަން އެބަޖެހޭ. އެހެންކަމުން އަޅުގަނޑުމެން އެބަޖެހޭ އީޖީއެމްތައް ބޭއްވުމުގެ މުއްދަތު ކުރުކުރަން. މި އިޞްލާޙާއެކު، ސެޕްޓެމްބަރު 21 ގައި ބޭއްވުމަށް ހަމަޖެހިފައިވާ އީޖީއެމްގެ ފަހުން އަވަހަށް އިތުރު އީޖީއެމްއެއް ބޭއްވިދާނެ،" ނާޒިމް ވިދާޅުވިއެވެ.

މި ބަދަލުތަކުގެ ފައިދާ ބީއެމްއެލްއަށް އެކަނި ނޫން ކަމަށާއި، އެހެން ކުންފުނިތަކަށްވެސް ލިބިގެންދާނެ ކަމަށް ނާޒިމް ވިދާޅުވިއެވެ. މީގެ ތެރޭގައި ފެނަކަ ކޯޕަރޭޝަން ސަބްސިޑިއަރީއެއްގެ ގޮތުގައި ކަނޑައެޅުމުގެ މަސައްކަތް ފަށާފައިވާ ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) ވެސް ހިމެނޭ ކަމަށް އޭނާ ވިދާޅުވިއެވެ.

މި މަސައްކަތުގެ ތެރޭގައި ކުންފުނިތަކުން އީޖީއެމްތައް ބާއްވަން ޖެހޭނެ ކަމަށް ނާޒިމް ވިދާޅުވިއެވެ.

މީގެ އިތުރުން، ސަރުކާރުގެ އަދި އަމިއްލަ ކުންފުނިތަކުގެ ބޯޑު ޑިރެކްޓަރުންގެ އަދަދު އިތުރުކުރުމުގެ ފުރުޞަތު ދޭ މާއްދާއެއްވެސް މި ބިލުގައި ހިމަނާފައިވެއެވެ. މި މާއްދާގައި ބަޔާންކޮށްފައިވާ ގޮތުން، ބޯޑުތަކުން ޑިރެކްޓަރުންގެ އަދަދު މަދުކަމަށް ފެނިއްޖެނަމަ، 10 ދުވަހުގެ ތެރޭގައި އައު ޑިރެކްޓަރުން އައްޔަންކޮށް، ބޭނުންވާ އަދަދަށް ޑިރެކްޓަރުންގެ އަދަދު އިތުރުކުރެވިދާނެއެވެ.