މާލޭގެ ގެސްޓްހައުސްއެއްގައި ހުރި އިންޑިއާ މީހަކަށް ބިރުދައްކައި، ބަޔަކު ފައިސާ ފޭރިގަތް ހާދިސާއެއް ހިނގައިފިއެވެ.
ރޭގެ ވަގުތެއްގައި "ޑޮލްފިން އިން" ނަމަކަށް ކިޔާ ގެސްޓްހައުސްގެ ކޮޓަރިއެއްގައި އޮއްވާ، ތިން މީހަކު ދޮރުގައި ޓަކިޖަހައި، އެތަނުގައި ހުރި މީހަކަށް އައި ކަމަށް ބުނެ ގަދަކަމުން ކޮޓަރިއަށް ވަދެފައިވެއެވެ.
މި ހާދިސާ ހިނގި ގޮތް ހިއްސާކުރަމުން، އަނިޔާ ލިބުނު އިންޑިއާ މީހާ ބުނެފައިވަނީ އެމީހުން ވަދެ، އޭނާގެ ކަރުގައި ވަޅިޖައްސައި، އެނދުމަތީ އޮތް ވޮލެޓުން ފައިސާ ނަގައިގެން ގޮސްފައިވާ ކަމަށެވެ. މި ތިން މީހުންނަކީވެސް ދިވެހިން ކަމަށް އޭނާ ބުނެފައިވެއެވެ. ފޭރިގަތް ތަކެތީގެ ތެރޭގައި 50-80 އެމެރިކާ ޑޮލަރު، 50 ޔޫރޯ، 200 ދިވެހި ރުފިޔާ، 3000 އިންޑިއަން ރުޕީސް އަދި އޭނާގެ ކަރުގައި އޮތް ފަށެއް ހިމެނެއެވެ.
ރާއްޖޭގެ ރިސޯޓެއްގައި ވަޒީފާ އަދާކުރަމުން އަންނަ މި އިންޑިއާ މީހާ މިހާރު ވަނީ މި މައްސަލަ ފުލުހުންނަށް ހުށަހަޅާފައެވެ.
ނަމަވެސް، މި ހާދިސާއާ ގުޅިގެން އަދި ފުލުހުންގެ ފަރާތުން އެއްވެސް ބަހެއް ލިބިފައެއް ނުވެއެވެ.
