ރާއްޖޭގައި ހުންނަ ޔޫއޭއީ އެމްބަސީން ކުލި ނުދައްކާ މައްސަލަ ނުބެލޭނެ ކަމަށް ސިވިލް ކޯޓުން ހުކުމްކޮށްފިއެވެ.
މި މައްސަލަ ކޯޓަށް ހުށަހެޅީ އާމިނަތު އަޙްމަދު ދީދީ ނަމަކަށް ކިޔާ ފަރާތަކުންނެވެ. އޭނާގެ ނަމުގައި ރަޖިސްޓްރީކޮށްފައިވާ ގ. ނިއުޝާ ކިޔާ ގޭގެ ފަހެއް، ހައެއް އަދި ހަތްވަނަ ފަންގިފިލާ 2020 މެއި 1 އިން 2022 އޮކްޓޯބަރުގެ ނިޔަލަށް ޔޫއޭއީ އެމްބަސީގެ އޮފީސް ހިންގުމަށް ދޫކޮށްފައިވާއިރު، ކުލީގެ ގޮތުގައި ލިބެންޖެހޭ 42,857.40 ޔޫއެސް ޑޮލަރު ނުލިބޭ ކަމަށް އޭނާ ބުނެފައިވެއެވެ.
އޭގެ އިތުރުން، އެއްވެސް ނޯޓިހެއް ނެތި ކުލީގެ އެއްބަސްވުން އުވާލާފައިވާތީ 48,720 ޔޫއެސް ޑޮލަރާއި، ޤާނޫނީ ޚަރަދުގެ ގޮތުގައި ހޭދަކުރި 750 ޔޫއެސް ޑޮލަރާއެކު ޖުމުލަ 92,427.40 ޑޮލަރު ހޯދުމަށް އެދިފައިވެއެވެ. ނަމަވެސް، މި މައްސަލައާ ގުޅިގެން ދަޢުވާ ލިބޭ ފަރާތުގެ ބަހެއް ހޯދުމަށް އެމްބަސީއަށް ދަޢުވާ ފޯމުގެ ލިޔުންތައް ފޮނުވުމަށް މަސައްކަތްކުރި ނަމަވެސް، އެ ލިޔުންތައް ރައްދުކުރެވިފައި ނުވާކަން ސިވިލް ކޯޓުން ފާހަގަކޮށްފައިވެއެވެ.
ސިވިލް ކޯޓުން ނިންމި ނިންމުމުގައި ބުނެފައިވަނީ، މި ދަޢުވާއަކީ އަމިއްލަ ފަރާތަކާއެކު އުފެދުނު މަދަނީ ޚުޞޫމާތަކާ ގުޅިގެން ހުށަހެޅިފައިވާ ދަޢުވާއެއް ކަމަށާއި، ރާއްޖޭގައި ހުންނަ އެމްބަސީތަކާއި ހައި ކޮމިޝަންތަކަކީ ވިއެނާ ކޮންވެންޝަން އޮފް ޑިޕްލޮމެޓިކް ރިލޭޝަންސް މުޢާހަދާގެ ދަށުން އިމްތިޔާޒު ލިބިގެންވާ ތަންތަން ކަމަށް މަދަނީ އިޖުރާއަތުގެ ޤާނޫނުގައި ބަޔާންކޮށްފައިވާތީ، މި ދަޢުވާ ކުރިއަށް ގެންދެވޭނެ ތަނެއް ނެތް ކަމަށެވެ.
މިގޮތަށް ނިންމުމާއެކު، ޔޫއޭއީ އެމްބަސީއާ ދެކޮޅަށް ހުށަހެޅުނު މި މައްސަލަ ބެލުމުގެ އިޚްތިޞާޞް ކޯޓަށް ލިބިގެން ނުވާކަމަށް ސިވިލް ކޯޓުން ކަނޑައަޅާފައިވެއެވެ.
