ދިވެހި ދައުލަތަށް ގްރީން ޓެކްސްގެ ގޮތުގައި ލިބޭ އާމްދަނީ އިތުރުވަމުންދާކަން މީރާގެ ތަފާސްހިސާބުތަކުން ދައްކައިފިއެވެ. މިއަހަރުގެ ފުރަތަމަ އަށް މަސްދުވަހު ގްރީން ޓެކްސްގެ ގޮތުގައި 719 މިލިޔަން ރުފިޔާ ލިބިފައިވާއިރު، މިއީ ފާއިތުވި އަހަރާ އަޅާބަލާއިރު 3.7 އިންސައްތައިގެ ކުރިއެރުމެކެވެ. 2023 ވަނަ އަހަރުގެ މި މުއްދަތުގައި ލިބިފައިވަނީ 686 މިލިޔަން ރުފިޔާއެވެ.
ގްރީން ޓެކްސް ނެގެމުންދަނީ ރާއްޖޭގެ އިންޓަގްރޭޓެޑް ޓޫރިސްޓް ރިސޯޓުތަކާއި، ރިސޯޓު ހޮޓާތަކާއި، އަދި ޓޫރިސްޓު އުޅަނދުތަކުގައި ތިބޭ ޓޫރިސްޓުންގެ އަތުން ކޮންމެ ދުވަހަކަށް މީހަކަށް 6 އެމެރިކާ ޑޮލަރުގެ މަގުންނެވެ. އަދި މީހުން ދިރިއުޅޭ ރަށްރަށުގައި ހިންގާ 50 ކޮޓަރި ނުވަތަ އެއަށްވުރެ މަދު ކޮޓަރި ހުންނަ ހޮޓާތަކާއި ގެސްޓްހައުސްތަކުގައި ތިބޭ ޓޫރިސްޓުންގެ އަތުން ދުވާލަކަށް 3 ޑޮލަރު ނެގެއެވެ.
މި ޓެކްސްގެ ގޮތުގައި ލިބޭ ފައިސާ ބޭނުންކުރެވެނީ ރާއްޖޭގެ އެކި ރަށްރަށުގައި ތިމާވެއްޓާ ގުޅުންހުރި ތަރައްޤީގެ މަޝްރޫޢުތަކަށެވެ. މީގެ ތެރޭގައި ފެނާއި ނަރުދަމާގެ މަސައްކަތްތަކާއި، ގޮނޑުދޮށް ހިމާޔަތްކުރުމުގެ މަސައްކަތްތަކާއި، އަދި ކުނި މެނޭޖްކުރުމުގެ މަޝްރޫޢުތައް ހިމެނެއެވެ. މިގޮތުން ގްރީން ފަންޑުން ރާއްޖޭގެ އެކި ކަންކޮޅުތަކުގައި ތިމާވެށްޓާ ގުޅުންހުރި ގިނަ މަޝްރޫޢުތަކަށް ޚަރަދުކުރަމުންދާކަން ފާހަގަކުރެވެއެވެ.
