މޯލްޑިވްސްގެ ޤައުމީ އެއާލައިން، މޯލްޑިވިއަނުން އިޢުލާނުކޮށްފައިވަނީ މަޝްހޫރު އޮންލައިން ޓްރެވަލް އޭޖެންސީ "ޓްރިޕް.ކޮމް" މެދުވެރިކޮށް އެ އެއާލައިންގެ ޓިކެޓްތައް ގަނެވޭނެ ކަމަށެވެ. މިދިޔަ ހުކުރު ދުވަހުން ފެށިގެން މި ޚިދުމަތް ފަށައިގަނެ، މިހާރު ޓްރިޕް.ކޮމް މެދުވެރިކޮށް މޯލްޑިވިއަންގެ ހުރިހާ ދަތުރުތަކަށް އޮންލައިންކޮށް ބުކިންގ ހެދުމުގެ ފުރުޞަތު ވަނީ ހުޅުވާލެވިފައެވެ.
މޯލްޑިވިއަންގެ ދަތުރުތައް މައިގަނޑު ގޮތެއްގައި ކުރެވެނީ އިންޑިއާ، ސްރީލަންކާ އަދި ބަންގްލަދޭޝްގެ އިތުރުން ރާއްޖޭގެ އެތެރޭގެ 16 މަންޒިލަކަށެވެ. މި އެއްބަސްވުމުގެ ސަބަބުން މޯލްޑިވިއަންގެ ޚިދުމަތްތައް ވަރަށް ބޮޑަށް ފުޅާވެގެންދާނެ ކަމަށް ބެލެވެއެވެ. ސަބަބަކީ ޓްރިޕް.ކޮމްއަކީ 39 ޤައުމެއްގައި ހިންގާ، 24 ބަހަކުން ޚިދުމަތް ދެމުންދާ ބައިނަލްއަޤްވާމީ ޓްރެވަލް އޭޖެންސީއެއް ކަމަށްވުމާއެކު، އެ ވެބްސައިޓް މެދުވެރިކޮށް 1.1 މިލިއަން ހޮޓަލާއި 510 އެއާލައިންގެ ފްލައިޓްތަކަށް ބުކިންގ ހެދޭތީއެވެ.
Exciting News!
Starting 13th Sept 2024, you can book Maldivian flights directly on https://t.co/lruONJc7Tm! ✈️ We are thrilled to make our services more accessible to travellers worldwide.
Read More: https://t.co/uyeAuISaIf #Maldivianaero #Maldives #VisitMaldives #Travel pic.twitter.com/XACJrCiAwS
— MaldivianAero (@MaldivianAero) September 14, 2024
މޯލްޑިވިއަންގެ ފްލީޓުގައި ޖުމްލަ 15 މަތިންދާ ބޯޓު ހިމެނެއެވެ. މީގެ ތެރޭގައި އޭޓީއާރް މާކާގެ ހަތަރު ބޯޓާއި، އެއާބަސް އޭ320 މާކާގެ އެއް ބޯޓުގެ އިތުރުން ޑޭޝް މާކާގެ ބޯޓުތައް ވެސް ހިމެނެއެވެ.
މި އައު އެއްބަސްވުމާއެކު މޯލްޑިވިއަންގެ ޚިދުމަތްތައް އިތުރަށް ފުޅާވެ، ބައިނަލްއަޤްވާމީ ފެންވަރުގައި އިތުރު ކުރިއެރުންތަކެއް ލިބޭނެ ކަމަށް އުއްމީދުކުރެވެއެވެ.
