މޯލްޑިވްސް ހައްޖު ކޯޕަރޭޝަންގެ އާ އޮފީސް އިމާރާތުގެ ބިންގާއަލައިފިއެވެ. މި އިމާރާތް ހެދުމަށް ހަމަޖެހިފައިވަނީ ހުޅުމާލޭގައި އަމީން އެވެނިއު ކުރިމަތީގައިވާ 5،000 އަކަފޫޓުގެ ހުސްބިމެއްގައެވެ. ހޮނިހިރު ދުވަހު ހެނދުނު ބޭއްވުނު ޚާއްޞަ ރަސްމިއްޔާތެއްގައި މި އިމާރާތުގެ ބިންގާ އަޅުއްވައިދެއްވީ ހައްޖު ކޯޕަރޭޝަންގެ މެނޭޖިންގ ޑިރެކްޓަރު މުޙައްމަދު ޝަކީލާއި އެ ކޯޕަރޭޝަންގެ އިސްވެރިންނެވެ.
މި މަޝްރޫޢުގެ މަސައްކަތް ހަވާލުކޮށްފައިވަނީ މެޑްޓެކް މޯލްޑިވްސް ޕްރައިވެޓް ލިމިޓެޑާއެވެ. ކޮންޓްރެކްޓާ ފައިނޭންސް އުސޫލުން 79.1 މިލިއަން ރުފިޔާއަށް ހަވާލުކޮށްފައިވާ މި މަސައްކަތް ނިންމުމަށް ދެވިފައިވަނީ ދޮޅު އަހަރު ދުވަހުގެ މުއްދަތެކެވެ. ނުވަ ފަންގިފިލާގެ މި އިމާރާތް ނިމުމުން، މިހާރު މާލޭގައި އަމިއްލަ ފަރާތެއްގެ އިމާރާތެއް ކުއްޔަށް ހިފައިގެން ހިންގަމުންދާ ހައްޖު ކޯޕަރޭޝަންގެ އޮފީސް އެތަނަށް ބަދަލުކުރެވޭނެއެވެ.
ބިންގާ އެޅުމުގެ ރަސްމިއްޔާތުގައި ވާހަކަފުޅު ދައްކަވަމުން، ހައްޖު ކޯޕަރޭޝަންގެ މެނޭޖިންގ ޑިރެކްޓަރ މުޙައްމަދު ޝަކީލް ވިދާޅުވީ ހައްޖު ކޯޕަރޭޝަނަކީ ކުޑަ ކުންފުންޏެއް ނޫން ކަމަށާއި، އެއީ އަމިއްލަ ޒާތުގައި ހިންގުމުގެ ޤާބިލްކަން ހުންނަންޖެހޭ ބޮޑު ކުންފުންޏެއް ކަމަށެވެ. އޭނާ އިތުރަށް ވިދާޅުވީ ފާއިތުވި 11 އަހަރު ތެރޭގައި ހައްޖު ކޯޕަރޭޝަން އެންމެ ރަނގަޅު ގޮތުގައި ހިންގާފައި ނުވާތީ، އެ ކޯޕަރޭޝަން އަބަދުވެސް ހިންގަން ޖެހެނީ ސަރުކާރަށް ބަރޯސާވެގެން ކަމަށެވެ. އަދި މަޤާމާ ހަވާލުވެވަޑައިގެންނެވިއިރު ރައީސުލްޖުމްހޫރިއްޔާ ޑރ. މުޙައްމަދު މުއިއްޒު އޭނާގެ ކިބައިން އެދިވަޑައިގަތީ ހައްޖު ކޯޕަރޭޝަން ނަގާ ކޮޅަށް ޖެހުމަށް ކަމަށްވެސް ޝަކީލް ފާހަގަކުރެއްވިއެވެ.
