ހއ. މާރަންދޫ ކައުންސިލްގެ ބައި-އިލެކްޝަން ކާމިޔާބު ކުރި އަބްދުލްޙަމީދުގެ މި ކާމިޔާބީއާ ގުޅިގެން ރައީސުލްޖުމްހޫރިއްޔާ އަދި ޕީއެންސީގެ ރައީސް ޑރ. މުޙައްމަދު މުޢިއްޒު ވަނީ މަރުޙަބާ ދަންނަވައި، އިންތިޚާބު ކާމިޔާބުކޮށްދިނުމަށް މަސައްކަތްކުރި އެންމެހައި ފަރާތްތަކަށާއި ވޯޓުލި ރައްޔިތުންނަށް ޝުކުރު އަދާކުރައްވާއިފިއެވެ. ހަމައެހެންމެ، ޕީއެންސީން ވެސް ވަނީ އަބްދުލްޙަމީދުގެ ކާމިޔާބީއަށް މަރުޙަބާ ކިޔާފައެވެ.
ހއ. މާރަންދޫ ކައުންސިލްގެ ބައި-އިލެކްޝަން މިއަދު ބޭއްވި ގޮތުގައި، ޕީއެންސީގެ ކެންޑިޑޭޓް އަބްދުލްޙަމީދު އަބްދުއްސައްތާރު ވަނީ 285 ވޯޓާއެކު އިންތިޚާބު ކާމިޔާބުކުރައްވާފައެވެ. އިދިކޮޅު އެމްޑީޕީގެ ކެންޑިޑޭޓް ޝިހާމް މުޙައްމަދަށް 250 ވޯޓު ލިބިވަޑައިގަތެވެ. މި އިންތިޚާބުގައި ވޯޓުލުމުގެ ޙައްޤު ލިބިފައިވާ 736 މީހުންގެ ތެރެއިން 560 މީހުން ވޯޓުލީއިރު، ސައްޙަ ވޯޓުގެ ގޮތުގައި 535 ވޯޓު ގުނުނެވެ.
މި ބައި-އިލެކްޝަން ބޭއްވުނީ މާރަންދޫ ކައުންސިލްގެ ނައިބު ރައީސް އަޙްމަދު ރަމީޒު މިދިޔަ ޖުލައި މަހުގެ 13 ވަނަ ދުވަހު ނިޔާވުމާ ގުޅިގެން، އެ މަޤާމަށް އައު މެންބަރަކު އިންތިޚާބުކުރުމަށެވެ.
