ޤައުމީ އެއާލައިން މޯލްޑިވިއަން އިން ޗައިނާގެ ތިން ސިޓީއަށް އަލަށް ދަތުރުތައް ފެށުމަށް ތައްޔާރުވަމުންދާކަން ހާމަކޮށްފިއެވެ.
މި ގޮތުން ގުއާންގްޖޯ، ޗެންޑޫ އަދި ބެއިޖިންގ އަށް ދަތުރުތައް ފެށުމަށްޓަކައި އެ ސިޓީތަކުގައި މޯލްޑިވިއަންގެ އެޖެންޓުންގެ ގޮތުގައި މަސައްކަތްކުރާނެ ފަރާތްތައް ހޯދުމަށް އިޢުލާނުކޮށްފައިވެއެވެ.
މި އެޖެންޓުންގެ މަސްއޫލިއްޔަތުތަކުގެ ތެރޭގައި ޖެނެރަލް ކާގޯގެ މަސައްކަތްތަކުގެ އިތުރުން، ރާއްޖެ އިޝްތިހާރުކޮށް ޕްރޮމޯޓްކުރުމާއި، ޗައިނާގެ އެކި ފަރާތްތަކާ ގުޅިގެން ކުރެވިދާނެ މާކެޓިންގ މަސައްކަތްތައް ދެނެގަނެ ތަންފީޒުކުރުން ހިމެނެއެވެ. މި މަޤާމުތަކަށް އެޖެންޓުން ހޯދަނީ ތިން އަހަރު ދުވަހުގެ މުއްދަތަށެވެ.
މޯލްޑިވިއަން އިން އިތުރަށް ބުނެފައިވަނީ މި ފުރުޞަތަށް ޝައުޤުވެރިވާ ފަރާތްތަކަށް އެކްސްޕްރެޝަން އޮފް އިންޓްރެސްޓް (އީއޯއައި) ހުށަހެޅުމުގެ މުއްދަތު މި މަހުގެ 19 ވަނަ ދުވަހުގެ ނިޔަލަށް ހުޅުވާލާފައިވާ ކަމަށެވެ. މި ފިޔަވަޅަކީ ރާއްޖޭގެ ފަތުރުވެރިކަމުގެ ދާއިރާ އިތުރަށް ފުޅާކޮށް، ޚާއްޞަކޮށް ޗައިނާގެ މާކެޓަށް އަމާޒުކޮށްގެން އަޅާ މުހިންމު ފިޔަވަޅެއް ކަމުގައި ބެލެވެއެވެ.
