ކ. މާލެ، މ. އަސަރީހަނދާން، ތަސްލީމް މުހައްމަދު، ދަތުރެއްގައި އުޅެނިކޮށް ގެއްލުނު މައްސަލައިގައި، ފުލުހުން މާލޭގެ އެކި ސަރަހައްދުތައް ބަލައި ފާސްކޮށްފައިވާ ކަމަށާއި، އޭނާ ހޯދުމަށް އިންޓަޕޯލްގެ ޔެލޯ ނޯޓިސްއަށް އެދިފައިވާ ކަމަށް ފުލުހުން މައުލޫމާތު ދީފިއެވެ.

އޮގަސްޓް 29 ވަނަ ދުވަހު، 25 މީހުންނާއި ދެ ކުޑަކުދިން ހިމެނޭ ގްރޫޕަކާއެކު ތަސްލީމް ކ. ހުވަފެންފުށި ދެކުނުން ހިއްކާފައި އޮންނަ ފަސްގަނޑަށް ދަތުރު ގޮސްފައިވެއެވެ. އޭނާ ގެއްލުނު ކަމަށް ފުލުހުންނަށް ރިޕޯޓު ކުރެވުނީ އޮގަސްޓް 30 ވަނަ ދުވަހުގެ މެންދުރު 1:20 ހާއިރުއެވެ.

ފުލުހުން ނެރުނު ބަޔާނެއްގައި ބުނެފައިވާ ގޮތުގައި، ތަސްލީމް ގެއްލުނު ކަމުގެ ރިޕޯޓު ލިބުމާއެކު، ފުލުހުންގެ މެރިން ޕޮލިސް އަދި އެމްއެންޑީއެފްގެ ކޯސްޓްގާޑަށް މައުލޫމާތު ހިއްސާކުރެވުނެވެ. އަދި އެމްއެންޑީއެފްގެ ޑައިވިން ޓީމުން އޮގަސްޓް 31، ސެޕްޓެންބަރު 1 އަދި ސެޕްޓެމްބަރު 6 ވަނަ ދުވަހު، ޖުމުލަ 943،998 އަކަމީޓަރުގެ ސަރަހައްދެއް ޑައިވްކޮށްގެން ބަލާފައިވެއެވެ.

ތަސްލީމްއާއެކު ދަތުރުދިޔަ ގްރޫޕު އެ ފަސްގަނޑަށް ދިޔައިރު، އެ ސަރަހައްދުގައި އިތުރު ބަޔަކު ދަތުރުގޮސް ތިބިކަމަށް ފުލުހުން ބުނެފައިވެއެވެ. އޮގަސްޓް 30 ވަނަ ދުވަހުގެ ހެނދުނު، ތަސްލީމް ދަތުރުގެ ބައިވެރިންނާއެކު ހަރަކާތްތެރިވާ މަންޒަރު ހިމެނޭ ފޮޓޯ އަދި ވީޑިއޯ ތަޙުޤީޤަށް ލިބިފައިވާ ކަމަށާއި، އޭނާ އެންމެ ފަހުން ފެނިފައިވަނީ އެ ދުވަހުގެ 07:00 އާއި 09:00 އާ ދެމެދު ކަމަށް ތަޙުޤީޤަށް ލިބިފައިވާ މައުލޫމާތުން އެނގޭ ކަމަށް ފުލުހުން ބުނެފައިވެއެވެ.

ތަސްލީމް މާލެ ދާން ބޭނުންވާ ކަމަށް ބުނުމާ ގުޅިގެން، އެ ދުވަހުގެ 10:00 އާއި 11:00 އާ ދެމެދު މާލެ ފުރި ލޯންޗުގައި އޭނާ ފޮނުވާލަން އުޅުނު ނަމަވެސް، ހޯދުމުން ފެނިފައި ނުވާ ކަމަށާއި، އެހެން ލޯންޗެއްގައި މާލެ ގޮސްފައިވޭތޯ ބެލުމަށް ދަތުރުގެ ބައިވެރިން ތަސްލީމްގެ އާއިލާއާ ގުޅައި މައުލޫމާތު ސާފުކޮށްފައިވާ ކަމަށް ފުލުހުން ބުނެފައިވެއެވެ. އޭނާ މާލެ ނާންނަ ކަމަށް އާއިލާއިން މައުލޫމާތު ދިނުމާ ގުޅިގެން، ދަތުރުގެ ބައިވެރިން އޭނާ ހޯދުމުގެ މަސައްކަތް ފެށި ކަމަށްވެސް ފުލުހުން ފާހަގަކޮށްފައިވެއެވެ.

މި މައްސަލައިގެ ތަޙުޤީޤުގައި ތަސްލީމްއާއެކު ދަތުރުދިޔަ މީހުންނާއި، އެ ފަސްގަނޑަށް ދަތުރުގޮސް އުޅުނު އިތުރު ގްރޫޕެއްގައި ހިމެނޭ 12 މީހުންނާ ސުވާލުކޮށްފައިވާ ކަމަށް ފުލުހުން ބުނެފައިވެއެވެ. އަދި ތަސްލީމްގެ ފޯނާއި ލެޕްޓޮޕްގެ ފޮރެންސިކް ތަޙްލީލު ކުރަމުންދާ ކަމަށާއި، ދަތުރަށް ބޭނުންކުރި ދެ ލޯންޗު ބަލައި ފާސްކޮށްފައިވާ ކަމަށާއި، މާލޭގައި އޭނާ އާންމުކޮށް ގޮސްއުޅޭ ސަރަހައްދުތައް ބަލައި ފާސްކޮށްފައިވާ ކަމަށް ފުލުހުން ބުނެފައިވެއެވެ.

ތަސްލީމް ހޯދުމަށް އިންޓަޕޯލްގެ ޔެލޯ ނޯޓިސްއަށް އެދިފައިވާ ކަމަށާއި، މި މައްސަލައާ ގުޅިގެން އޭނާގެ އާއިލާއާ ބައްދަލުކޮށް މައުލޫމާތު ސާފުކޮށް، ތަޙުޤީޤު ކުރިއަށްދާ ގޮތުގެ މައުލޫމާތު ހިއްސާކޮށްފައިވާ ކަމަށް ފުލުހުން ބުނެފައިވެއެވެ.

އިންޓަޕޯލްގެ ޔެލޯ ނޯޓިސްއަކީ ގެއްލިގެން ހޯދާ މީހުން ހޯދުމުގެ އެހީތެރިކަމަށް އެދި ނެރޭ ނޯޓިހެކެވެ. މީގެ ކުރިން ރާއްޖެއިން މިފަދަ ނޯޓިހެއް ނެރެފައިވަނީ ގެއްލިގެން ހޯދަމުންދިޔަ ނޫސްވެރިޔާ އަހުމަދު ރިލްވާން އަބްދުﷲ ހޯދުމަށެވެ.