ހައުސިން މިނިސްޓްރީއިން ކޮންޓްރެކްޓް ޕްރައިވެޓް ލިމިޓެޑަށް 818،441 ރުފިޔާ ދެއްކުމަށް ސިވިލް ކޯޓުން އިއްޔެ ހުކުމް ކޮށްފިއެވެ.
މި ފައިސާއަކީ ގްރީން އޮފީސް ބިލްޑިން އިމާރާތް ކުރުމުގެ ޕްރޮޖެކްޓުގައި އެ ކުންފުނިން ކޮށްފައިވާ މަސައްކަތްތަކަށް ނުދައްކާ އޮތް އަގެވެ. މި ދަޢުވާ އަމާޒުވެފައިވަނީ ކުރީގެ ސަރުކާރުގައި ހިނގަމުން އައި މިނިސްޓްރީ އޮފް ނޭޝަނަލް ޕްލޭނިން އެންޑް އިންފްރާސްޓްރަކްޗަރއާ ދެކޮޅަށް ކަމުގައިވިއަސް، ދަޢުވާ އުފުލާފައިވަނީ މިދިޔަ މާރޗު މަހުގެ 19 ވަނަ ދުވަހުއެވެ. މިހާރު އެ މިނިސްޓްރީގެ ނަން ބަދަލުވެފައިވަނީ މިނިސްޓްރީ އޮފް ހައުސިން، ލޭންޑް އެންޑް އާބަން ޑިވެލޮޕްމެންޓަށެވެ.
މިނިސްޓްރީން ދަޢުވާއަށް ޖަވާބުދާރީވެފައިވަނީ މުއްދަތު ހަމަވުމަށްފަހުގައި ކަމަށްވުމާއެކު، ކޯޓުން ވަނީ އެ ޖަވާބު ބަލައިނުގަތުމަށް ނިންމާފައެވެ. އެހެންކަމުން، މިނިސްޓްރީން ދަޢުވާއަށް ވަކި ޖަވާބެއް ނުދޭ ކަމަށް ނިންމައި، ކޯޓުން ވަނީ ކޮންޓްރެކްޓް ޕްރައިވެޓް ލިމިޓެޑްގެ އެދުމާ އެއްގޮތަށް 818،441 ރުފިޔާ ތިން މަސްދުވަހުގެ ތެރޭގައި ދެއްކުމަށް މިނިސްޓްރީއަށް އަމުރުކޮށްފައެވެ.
ކުރީގެ ސަރުކާރުން ގްރީން އޮފީސް ބިލްޑިން ބޭނުންކޮށްފައިވަނީ ތިމާވެއްޓާ ބެހޭ ޕްރޮޖެކްޓެއް ހިންގުމަށެވެ. މި އިމާރާތަކީ ބްރީމް ސެޓިފިކެޓް ލިބިފައިވާ އިމާރާތެކެވެ.
