ރާއްޖެއާއި ޗައިނާއާ ދެމެދު، ދެ ގައުމުގެ ފައިސާއިން މުޢާމަލާތްކުރަން ފެށުމުގެ ސަބަބުން އިޤްތިޞާދީ އަދި މާލީ ގޮތުން ގިނަ ކުރިއެރުންތަކެއް ލިބިގެންދާނެ ކަމަށް އިކޮނޮމިކް މިނިސްޓަރު މުޙައްމަދު ސަޢީދު ވިދާޅުވެއްޖެއެވެ.
އިއްޔެ ދިވެހި ސަރުކާރާއި ޗައިނާގެ ޕީޕަލްސް ބޭންކް (ޕީބީއޯސީ) އާ ދެމެދު، ކަރަންޓް އެކައުންޓް މުޢާމަލާތްތައް ދެ ގައުމުގެ ފައިސާއިން ހިންގުމަށް މަގުފަހިކޮށްދޭ އެއްބަސްވުމެއްގައި ސޮއިކުރެވުނެވެ. މިނިސްޓަރު ސަޢީދު ވިދާޅުވީ މި އެއްބަސްވުމަކީ ޗައިނާއާއި ރާއްޖެއާ ދެމެދު އޮތް ގާތް ގުޅުން ދައްކުވައިދޭ އެއްޗެއް ކަމަށާއި، މީގެ ސަބަބުން ވިޔަފާރިއާއި މާލީ ދާއިރާގައި ދެ ގައުމަށް އެއްބާރުލުން ލިބި، އިޤްތިޞާދީ ގުޅުންތަކަށް މުހިންމު ބަދަލުތަކެއް އަންނާނެ ކަމަށެވެ.
މިއީ ރާއްޖެއަށް ތާރީޚީ ބަދަލެއް ގެނެސްދޭނެ އެއްބަސްވުމެއް ކަމަށާއި، މިހާރު ރާއްޖެއަށް ދިމާވެފައިވާ ޑޮލަރުގެ ދަތިކަމަށްވެސް ޙައްލު ލިބި، ވިޔަފާރިވެރިންނަށް އެތައް ގޮތަކުން ފައިދާވެ، ލުއިފަސޭހަވެގެންދާނެ ކަމެއް ކަމަށް އޭނާ ވިދާޅުވިއެވެ.
މިނިސްޓަރު ސަޢީދު އިތުރަށް ވިދާޅުވީ މިއީ ކުރު މުއްދަތެއްގެ ތެރޭގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހޯއްދެވި ވަރަށް ބޮޑު ކާމިޔާބީއެއް ކަމަށެވެ. ރައީސް މުޢިއްޒު މިއަހަރުގެ ކުރީކޮޅު ޗައިނާއަށް ކުރެއްވި ރަސްމީ ދަތުރުފުޅުގައި އިޤްތިޞާދާ ގުޅޭގޮތުން ގިނަ މަޝްވަރާތަކެއް ކުރައްވައި، އެ ގައުމުގެ ރައީސްއާއެކުވެސް ގިނަ މަޝްވަރާތަކެއް ކުރެއްވިކަން ފާހަގަކޮށްލެވެއެވެ.
