ދުނިޔޭގެ ކުރެޑިޓް ރޭޓިން ކުންފުނިތަކުން ފުރަތަމަ ފަހަރަށް އިސްރާއީލުގެ ކުރެޑިޓް ރޭޓިން ދަށް ކޮށްފިއެވެ. މިއީ އިސްރާއީލުގެ ތާރީޚުގައިވެސް ފުރަތަމަ ފަހަރަށް، ކުރެޑިޓް ރޭޓިން އޭޖެންސީތަކުން އެގައުމުގެ ކުރެޑިޓް ރޭޓިން ދަށްކުރި ފުރަތަމަ ފަހަރެވެ.
ހަމަ އެއާއެކު މާލީ އިދާރާތަކުން މިހާރު ވަނީ، ކުރިއަށް އޮތް މަސްތަކުގައި އިސްރާއީލުގެ 40،000 އަށްވުރެ ގިނަ ވިޔަފާރި ބަނގުރޫޓުވާނެ ކަމަށް ލަފާކޮށްފައެވެ.
މާލީ އިދާރާތަކާއި އަދި އިގްތިސާދީ ތަޖުރިބާކާރުން ވިދާޅުވީ ގޮތުގައި އިސްރާއީލުގެ އިގްތިސާދަށް ކުރިމަތިވަމުން މި ބޮޑެތި ގޮންޖެހުންތަކުގެ އަސްލަކީ އެގައުމުގެ ފަތުރުވެރިކަން ދަށްވެ، ފޮރިން އިންވެސްޓަމަންޓާއި ކޮންޒަމްޕްޝަން ޓްރޭޑް އިނދަ ޖެހިގެން ދިއުމެވެ.
ފަތުރުވެރިކަން މުޅިން ހުއްޓި، އަދި ޚަރަދުކުރުމާއި، ވިޔަފާރިއާއި، ބޭރުގެ އިންވެސްޓްމަންޓްތައް ދަށަށް ގޮސްފައިވާއިރު، ޣައްޒާއާ ދެކޮޅަށް އިސްރާއީލުން ކުރަމުންދާ ހަނގުރާމައިގެ ސަބަބުން އެ ޤައުމުގެ އިޤްތިޞާދުގެ ގާތްގަނޑަކަށް ހުރިހާ ދާއިރާއަކަށް ގެއްލުން ލިބިފައިވާކަމަށްވެސް މާލީ އިދާރާތަކުން ބުނެފައި ވެއެވެ.
މި ހާލަތު މިހެން ދިމާވެފައިވަނީ، އަންނަ އަހަރާ ހަމައަށް 55 ބިލިއަން ޑޮލަރަށްވުރެ އިތުރުވާނެ ކަމަށް ލަފާކުރެވޭ ހަނގުރާމައިގެ ޚަރަދުތައް ހަމަޖެއްސުމަށް ސަރުކާރުގެ ޚަރަދުތަކާއި ދަރަނި އިންތިހާއަށް އިތުރުވަމުންދާ ދަނޑިވަޅެއްގައެވެ. އަދި އިސްރާއީލުން ކުރަމުންދާ ހަނގުރާމަ ދެހެއްޓުމަށް އެގައުމުން ލޯނުތައް ނެގުމާއި އަދި ޚަރަދު ހަމަޖެއްސުމަށް ބަޖެޓް ސަޕޯޓަށް ފައިސާ ހޯދުމަށް އޮތް ޑިމާންޑްވެސް ދަނީ އިންތިހާއަށް އިތުރު ވަމުންނެވެ. މި އަދަދު އަންނަ އަހަރު 67 ބިލިއަން ޑޮލަރަށް އަރާނެކަމަށް މިހާރުވަނީ ލަފާ ކުރެވިފައެވެ.
އިސްރާއީލުގެ އިގްތިސާދީ މާހިރުން މިހާރު ގެންދަވަނީ، އެގައުމުން އިގްތިސާދީ ގޮތުން ސަލާމަތީ އަވަސް ފިޔަވަޅުތަކެއް ނާޅާއިފިނަމަ، އެގައުމަށް އިގްތިސާދީ ކާރިސާއަކާ ކުރިމަތިލާން ޖެހޭނެކަމުގެ އިންޒާރު ދެމުންނެވެ.
