މަގުމަތީގެ ސަލާމަތާއި ރައްކާތެރިކަން ކަށަވަރުކުރުމަށް ފުލުހުން ފަށާފައިވާ ޚާއްޞަ މަސައްކަތްތަކުގެ ދަށުން މިދިޔަ 3 ދުވަހު، 291 އުޅަނދު ބަލައިފާސްކޮށް މާލެ ސަރަޙައްދުން 76 އުޅަނދަކަށް ފިޔަވަޅު އަޅާފައިވާކަމަށް ފުލުހުން ވިދާޅުވެފައިވެއެވެ. ސެޕްޓެމްބަރު 8، 9، 10 ވަނަ ދުވަހު މާލެއާއި ހުޅުމާލޭގައި ކުރިއަށްގެންދިޔަ ޓްރެފިކް އޮޕަރޭޝަންތަކުގައި ހުޅުމާލެއިން ހަތަރުފުރޮޅުލީ 30 އުޅަނދު، 229 ސައިކަލު އަދި މާލެއިން ހަތަރުފުރޮޅުލީ 10 އުޅަނދާއި 22 ސައިކަލު ބަލައިފާސްކޮށްފައިވެއެވެ. މީގެ ތެރެއިން ހުޅުމާލެއިން 55 އުޅަނދަކަށާއި މާލެއިން 22 އުޅަނދަކާމެދު ފިޔަވަޅު އަޅާފައިވެއެވެ.
މަގުމަތީގެ ސަލާމަތާއި ރައްކާތެރިކަން ކަށަވަރުކުރުމަށް ފުލުހުން ކުރަމުންދާ މަސައްކަތުގެ ތެރެއިން ސެޕްޓެންބަރު 9 ވަނަ ދުވަހުގެ 09:00 އިން ފެށިގެން ސެޕްޓެންބަރު 10 ވަނަ ދުވަހުގެ 09:00 އަށް މާލޭގައި ކޮށްފައިވާ މަސައްކަތުގެ ތަފާސް ހިސާބު pic.twitter.com/DE9vYZPGgK
— Maldives Police (@PoliceMv) September 11, 2024
ނުރައްކާތެރިކޮށް ދުއްވައިގެން މާލެއިން 4 އުޅަނދާއި ހުޅުމާލެއިން 5 އުޅަނދު ހުއްޓުވާފައިވާއިރު، ލައިސަންސް ނެތި ދުއްވައިގެން މާލެއިން ހަތަރު ފުރޮޅުލީ 2 އުޅަނދާއި 15 ސައިކަލު، އަދި ހުޅުމާލެއިން 8 ސައިކަލު ހިފަހައްޓާފައިވެއެވެ. ޖުމްލަ 39 އުޅަނދެއް ޓޯކޮށްފައިވާއިރު، 47 އުޅަނދެއް ވަނީ ނަސޭހަތްދީ ދޫކޮށްލާފައެވެ.
މާލެ ސަރަޙައްދުގައި ނުރައްކާތެރި އެކްސިޑެންޓްތައް އިތުރުވަމުންދާތީ، ޓްރެފިކް ޤާނޫނުތަކާއި ގަވާއިދުތައް ތަންފީޒުކުރުން ހަރުދަނާކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ކަމާ ގުޅުންހުރި އިދާރާތަކަށް ގޮވާލައްވާފައެވެ.
މިއާއެކު 24 ގަޑިއިރު މަގުތައް ޕެޓްރޯލްކުރާގޮތަށް ފުލުހުންގެ ޚާއްޞަ އޮޕަރޭޝަންތަކެއް ވަނީ ފަށާފައެވެ.
ކޮމެންޓު ފޮނުވާ