ސޯސަން މަގު ކުރިމަތީގައި ހުރި "ގާމަގު ކެފޭ" ހިންގާ އިމާރާތުގައި މިއަދު ހިނގި އަލިފާނުގެ ހާދިސާއާ ގުޅިގެން 37 މީހަކު ހާލުގައި ޖެހިފައިވާ ކަމަށް ނެޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން މަޢުލޫމާތު ދީފިއެވެ.
އެންޑީއެމްއޭ އިން ހާމަކުރި ގޮތުގައި ހ. ދޫހިމިރި ގޭގައި ހިނގި މި ހާދިސާގައި ހާލުގައި ޖެހުނު މީހުންގެ ތެރޭގައި 22 ދިވެހިންނާއި 15 ބިދޭސީން ހިމެނެއެވެ. މި ފަރާތްތަކަށް ބޭނުންވާ އިންސާނީ އެހީތެރިކަން ފޯރުކޮށްދިނުމުގެ މަސައްކަތްތައް ކުރިއަށްދާ ކަމަށްވެސް އެންޑީއެމްއޭ އިން ފާހަގަކޮށްފައިވެއެވެ.
މި ހާދިސާއާ ގުޅިގެން ދުމުގެ އަސަރުކޮށްގެން ދެ މީހަކު އޭޑީކޭ ހޮސްޕިޓަލަށް ގެންދެވުނެވެ. މީގެ ތެރެއިން އުމުރުން 30 އަހަރުގެ ބިދޭސީ އަންހެނާ މިހާރު ވަނީ ދޫކޮށްލާފައެވެ. އަދި 48 އަހަރުގެ ދިވެހި އަންހެނާގެ ހާލުވެސް ރަނގަޅު ކަމަށް އޭޑީކޭ ހޮސްޕިޓަލާ ހަވާލާދީ އެމްއެންޑީއެފުން މަޢުލޫމާތު ދީފައިވެއެވެ.
އިމާރާތުގައި އަލިފާން ރޯވާން ދިމާވި ސަބަބެއް އަދި އެނގިފައެއް ނުވާ ކަމަށް ވެސް ފާހަގަކުރެވެއެވެ.
