ހ. ދޫހިމެރިގޭގައި ރޯވެ އަނދަމުންދާ އަލިފާނުގެ ހާދިސާގައި ދެމީހަކަށް ދުމުގެ އަސަރު ކޮށްގެން ހޮސްޕުޓަލަށް ގެންގޮސްފައިވާކަމަށް ފުލުހުން މައުލޫމާތު ދީފިއެވެ.

އެމްއެންޑީއެފް އިން މައުލޫމާތު ދެއްވާފައިވަނީ ހ. ދޫހިމެރިގޭގައި އަލިފާނުގެ ހާދިސާއެއް ހިނގައިގެން ސިފައިން ހަރަކާތްތެރިވަމުން އަންނައިރު އަދިވެސް އަލިފާންގަޑު މުޅިން ކޮންޓްރޯލް ކުރެވިފައެއް ނުވެއެވެ. އެ ސަރަހައްދުން ފެންނަ މަންޒަރުތަކުން އެތަނުގައި ވަރަށް ބޮޑަށް ރޯވެފައި ހުރި މަންޒަރު ފެނިގެންދާއިރު، ގިނަ އަދަދެއްގެ އާއްމުން އެ ސަރަހައްދުގައި ދަނީ ހަރަކާތްތެރިވަމުންނެވެ. ބެލެވޭގޮތުގައި ރޯވެފައި ވަނީ އެ ކެފޭގެ ބަދިގޭގައެވެ.

ފުލުހުން ވިދާޅުވެފައިވަނީ ދޫހިމެރިގެ މަގާއި، ސޯސަން މަގު ކަންމަތީގައި ހުރި ކެފޭއެއްގައި އަލިފާން ރޯވެފައިވާ ކަމުގެ މައުލޫމާތު ލިބިގެން ފުލުހުން ދަނީ ހަރަކާތްތެރި ވަމުންނެވެ. އެމްއެންޑީއެފް އިން ވިދާޅުވެފައިވާ ގޮތުގައި، މި ހާދިސާގެ މައުލޫމާތު ލިބިފައި ވަނީ މެންދުރު 14:47 ހާއިރުއެވެ.

އަލިފާން ނިއްވާލުމުގެ މަސައްކަތް ކުރަމުންދާއިރު ކައިރި ގެތަކަށް ވެސް އަލިފާނާއި ދުން ކޮންމެވެސް ވަރަކަށް ފެތުރިފައިވާތީ، ސަލާމަތަށް ޓަކައި ކައިރި ގެތަކުން މީހުން ނެރުމުގެ މަސައްކަތް ދަނީ ކުރަމުންނެވެ. ފުލުހުން އިތުރަށް ވިދާޅުވެފައިވަނީ މި ހާދިސާއާ ގުޅިގެން މަގުމަތީގައި ތިބި ދެ މީހަކަށް ދުމުގެ އަސަރުކޮށްގެން ހޮސްޕިޓަލަށް ގެންގޮސްފައިވާ ކަމަށެވެ. އެއީ ބިދޭސީ އަންހެނަކާއި ބިދޭސީ ފިރިހެނެއް ކަމަށްވެސް ވިދާޅުވިއެވެ.

އަލިފާން ނިއްވާލުމަށް ކުރަމުންދާ މަސައްކަތުގެ ވީޑިއޯތަކުން ފެންނަ ގޮތުގައި ފަޔާ ފައިޓަރުން ދަނީ ކައިރި އިމާރާތެއްގެ ފުރާޅުމައްޗަށް އަރައި ފެން ޖަހަމުންނެވެ.

ތަފްސީލު އަންނަނީ..