ޖޯޑަން އާއި ހިފާފައިވާ ވެސްޓް ބޭންކުގެ ބޯޑަރ ޕޮއިންޓެއްގައި އިސްރާއީލުގެ ތިން މީހަކު މަރާލައިފި

ޖޯޑަން އާއި ހިފާފައިވާ ވެސްޓް ބޭންކުގެ ބޯޑަރ ޕޮއިންޓެއްގައި އިސްރާއީލުގެ ތިން މީހަކު މަރާލައިފިއެވެ.

އިސްރާއީލު ޑިފެންސް ފޯސަސް (އައިޑީއެފް) އިން ބުނާ ގޮތުގައި މާހެރް ޖަޒީ ނަމަކަށް ކިޔާ ޖޯޑަންގެ މީހާ ހަމަލާދިން މީހާ އެލެންބީ ބްރިޖް ކްރޮސިންގ އަށް ޖޯޑަންއާއި ވީ ފަޅުން ޓްރަކެއްގައި އައިސް، ޓްރަކުން ފައިބައި ބަޑިން ހަމަލާދީގެންނެވެ.

އިސްރާއީލުން ބުނެފައިވަނީ އިސްރާއީލުން ސިފައިން ވަނީ ހަމަލާދިން މީހާ "މަރާލާފައި" ކަމަށާއި އަދި އައިޑީއެފްއިން ޓްރަކުގައި ގޮވާ އެއްޗެހި ހުރިތޯ ބަލާފައިވާކަމަށް ބަޔާނެއްގައި ބުނެފައިވެއެވެ.

މި ހާދިސާ ހިނގާފައިވަނީ އިސްރާއީލުގެ ބާރުގެ ދަށުގައިވާ ސަރަޙައްދެއްގައި ކަމަށާއި، އެއީ ޖޯޑަންގެ އުޅަނދުތަކުން ވެސްޓް ބޭންކަށް ވަންނަ މުދާ ބާލާ ސަރަހައްދުގައި ކަމަށް ޖޯޑަން އިން ބުނެފައިވެއެވެ. މިހާރު ބޯޑަރ ޕޮއިންޓް ވަނީ ދެ ފަރާތުންވެސް ބަންދުކޮށްފައެވެ.

އިސްރާއީލުގެ މީޑިއާތަކުން ރިޕޯޓުކުރާ ގޮތުގައި މަރުވި މީހުންނަކީ ޔޮހަނަން ޝްޗޯރީ (61 އަހަރު)، ޔޫރީ ބަރްނބަމް (65 އަހަރު) އަދި އެޑްރިއަން މާސެލޯ ޕޮޑްޒަމްކަރ (އުމުރު ހާމަކޮށްފައި ނުވޭ) އެވެ.

މި ތިން މީހުންނަކީ ބޯޑަރ ކްރޮސިންގ ގައި މަސައްކަތްކުރި ގާޑުން ކަމަށާއި ނަމަވެސް އެމީހުންނަކީ މިލިޓަރީ ނުވަތަ ފުލުހުންގެ މީހުން ނޫން ކަމަށް ބުނެފައިވެއެވެ.

އިސްރާއީލުގެ ސްޓޭޓް ބްރޯޑްކާސްޓަރ ކަން ނިއުސްއިން ރިޕޯޓުކުރާ ގޮތުގައި ޖަޒީއަކީ 39 އަހަރުގެ ޓްރަކް ޑްރައިވަރެކެވެ.

ވީޑިއޯ ފުޓޭޖްތަކުން ދައްކާ ގޮތުގައި ހަމަލާދިން މީހާ ޓާމިނަލްއަށް ހިނގާފައި ގޮސް ތިން ފަހަރު ބަޑި ޖަހާފައިވާ އިރު، އޭނާ ވަނީ މަރާލެވިފައެވެ.

ޖޯޑަންގެ ބޯޑަރ އޮފިޝަލެއް ރޮއިޓަރޒްއަށް ބުނެފައިވާ ގޮތުގައި މުދާ ބާލާ ސަރަހައްދުގައި ތިބި މަދުވެގެން 24 ޖޯޑާނިއަން ޓްރަކް ޑްރައިވަރުން ވަނީ އިސްރާއީލުގެ މިލިޓަރީން ސުވާލުކުރުމަށް ހައްޔަރުކޮށްފައެވެ.

މި ހާދިސާއާ ގުޅިގެން ޖޯޑަންއާ ދެމެދު އޮތް އިސްރާއީލުގެ ހުރިހާ އެއްގަމު މަގުތަކެއް ވަނީ ބަންދުކޮށްފައި ކަމަށް އިސްރާއީލު އެއަރޕޯޓްސް އޮތޯރިޓީން ބުނެފައިވެއެވެ.

އެލެންބީ ބްރިޖް ކްރޮސިންގ (ކިންގ ހުސެއިން ބްރިޖް ގެ ނަމުންވެސް މަޝްހޫރު) އޮންނަނީ އަމާންއާއި ޖެރޫސަލަމްއާ ދެމެދު ގާތްގަނޑަކަށް މެދުތެރޭގައެވެ. މިއީ ވެސްޓް ބޭންކާއި ޖޯޑަންއާ ދެމެދު އޮންނަ ހަމައެކަނި ރަސްމީ ކްރޮސިންގ އެވެ. އަދި މިއީ އިސްރާއީލު ހުރަސް ނުކޮށް ވެސްޓް ބޭންކަށް ވަދެވޭ ހަމައެކަނި ގޮތެވެ.

ޖޯޑަންއާއި އިސްރާއީލުގެ ދެމެދުގައި ސެކިއުރިޓީ، ވިޔަފާރި އަދި ޑިޕްލޮމެޓިކް ގުޅުން އޮތް ނަމަވެސް – ޖޯޑަންއަކީ ފަލަސްތީނުންނާމެދު އިސްރާއީލުން އަމަލުކުރާ ގޮތާމެދު ފާޑުކިޔާ ޤައުމެކެވެ.

ވެސްޓް ބޭންކާއި އިސްރާއީލުގެ މާރުކޭޓުތަކަށް މުދާ ސަޕްލައިކުރުމަށް ކޮންމެ ދުވަހަކު ޑަޒަނަކަށް ޓްރަކު ޖޯޑަންއިން އެބަ ކްރޮސްކުރެއެވެ.