މާލެ ސަރަޙައްދުގައި ދެމުންގެންދާ ރާއްޖެ ޓްރާންސްޕޯޓު ލިންކު (އާރްޓީއެލް) ބަހުގެ ޚިދުމަތް ފެށުމުގެ ވަގުތު އަވަސްކުރުމަށް ނިންމާފައިވާކަން އެމްޓީސީސީން މިއަދު އިޢުލާނުކޮށްފިއެވެ. މި ބަދަލާ އެކު، ސެޕްޓެމްބަރު 8 ވާ އާދީއްތަ ދުވަހުން ފެށިގެން ގްރޭޓަރ މާލެ ސަރަޙައްދަށް ފޯރުކޮށްދެމުންދާ އާރްޓީއެލްގެ ބަހުގެ ޚިދުމަތް ހެނދުނު 6:00 ގެ ބަދަލުގައި 5:00 އަށް އަވަސްކުރެވޭނެއެވެ.
މި ބަދަލު ގެނެވޭނީ އާރް 1، އާރް 2، އާރް 6، އާރް 7، އާރް 8، އާރް 10، އާރް 11 އަދި އާރް 12 ރޫޓުތަކުގެ ދަތުރުތަކަށެވެ. އެމްޓީސީސީން ހާމަކުރި ގޮތުގައި މި ނިންމުމަކީ ކަސްޓަމަރުންގެ ފަރާތުން ލިބިފައިވާ ޚިޔާލުތަކަށް ރިޢާޔަތްކޮށް، އެ ކުންފުނީގެ މެނޭޖިންގ ޑިރެކްޓަރުގެ އިރުޝާދުގެ ދަށުން ނިންމާފައިވާ ނިންމުމެކެވެ.
އެމްޓީސީސީން އިތުރަށް ބަޔާންކޮށްފައިވަނީ އެ ކުންފުނިން އަބަދުވެސް މަސައްކަތް ކުރަމުންދަނީ ކަސްޓަމަރުންނަށް ލުއިފަސޭހަ ގޮތްތައް ހޯދައިދިނުމަށް ކަމަށެވެ.
